瘋狂世界盃補習社（七），擺烏龍隨時命仔不保

艾斯高巴，一位名不經傳的哥倫比亞後衛球員。他，本來藉藉無名，卻在一夜之間成為全球所有報章雜誌的「風雲人物」，可惜下場卻以悲劇告終。時為1994年，哥倫比亞昂然殺入美國世界盃決賽周，點解話昂然呢？因為當屆南美洲區外圍賽，哥倫比亞就係一路奇兵過關斬將，更曾經在主場以5-0狂數阿根廷，在世界盃舉行前夕，人稱「烏鴉口」的球王比利更表示，睇好哥倫比亞可以歷史性晉身四強，能與當年一眾勁旅分庭抗禮。
可惜，或者人算不如天算，世界盃第一場分組賽對羅馬地亞，「意外地」敗陣；接著第二場對主辦國的美國，哥倫比亞應該以為自己「有得執」，誰知就是艾斯高巴的烏龍球最後慘負出局，國家隊提早執包袱。其實大熱倒灶向來屢見不鮮，只是此子在返國後因一次在酒吧與旁人爭吵議論，期間有人不忿因他的烏龍球被累及輸錢而將他槍殺。因為一個烏龍球而無咗條命仔，真係點講都不值錢。

嗱嗱嗱，今屆首個紅牌就係哥倫比亞呀，中場球員山齊士摩蘭奴禁區內手球輪咗個12碼俾日本，最後以寡敵眾輸波了。當然，分組賽雖然未踢完，或者哥倫比亞可以再行前多幾步，但係萬一真係分組賽出局，我還是好心建議山齊士摩蘭奴為安全之計，唔好隨團返回哥倫比亞老家好了，直接由俄羅斯漏夜搭飛機返西班牙球會愛斯賓奴提早報到好啦。

你可能還對以下內容感興趣
瘋狂世界盃補習社（六） 荷蘭先係絕種二奶命
NBA終於選完秀 三大輸家係邊位？
早到機場唔想齋等？ Plank到上機有冇得諗
瘋狂世界盃補習社（四） 睇世界盃，學世界歷史
資料來源：men's uno (http://hk.mensuno.asia/node/%E7%98%8B%E7%8B%82%E4%B8%96%E7%95%8C%E7%9B%83%E8%A3%9C%E7%BF%92%E7%A4%BE%EF%BC%88%E4%B8%83%EF%BC%89-9881)
本文由《men's uno》授權報導，未經同意禁止轉載。