一百樣男人永遠搞不懂女人的事？│「好」姊妹？│〈４〉

有樣野柳臣作為男人係從來都諗唔明，就係你班「姊妹」。
男人會將最要好既朋友叫做兄弟，但係原來女人揀「姊妹」係有一套男人永遠都唔明白既準則。

１）為什麼要和討厭的人做姊妹？
只要你係男人，你就一定聽過女朋友同你抱怨佢姊妹點點點。
男人呢個時候，個腦只會係度思考兩件事：
一、關我咩事？二、又關你咩事？
明明睇佢唔順眼，又要同佢做朋友？做朋友都算啦，仲要做姊妹？男人識朋友，可以化敵為友。但唔會以敵為友。憎佢就憎佢，唔會擺佢係自己最親近既位置咁蠢。
但係女人往往相反，佢平日講到有幾討厭幾八婆個個，見面既時候一定係攬頭攬頸最閨蜜個個。
係咪女人天生有自虐傾向？相處應該係選擇同自己夾既人一齊開心，點解女人愈唔開心，友誼愈深？
明明很討厭對方，為什麼總是表現得很親近？你唔係好憎佢架咩？

２）為什麼要互相比較，而且總覺得自己應該比對方優勝？
男人好少咁無聊，走去比較自己同兄弟邊個靚仔啲。
但女人最鐘意攞黎比較既對象，一定係佢既好姊妹。
沒有比較，沒有傷害，點解要比較呢？而且個種比較心到底係點黎？
每一個女人都會覺得自己係班姊妹較好既一個，不論係著衫打扮身材外貌。但最激起女人妒忌心既係，繼而嬲咗自己姊妹既係：「明明自己理論上比對方優勝，點解對方有人追、幸福、受追棒。」
簡單講就係「憑什麼你比我好？」
如果話女人唔想自己既朋友幸福，實有好多女士走出黎反對。
準確而言，女人係「討厭自己既姊妹比自己更幸福。」

３）你跟她要好只因怕她傷害你？
呢個系列照舊係負責提問不作解答，但係根據柳臣多年既觀察。
我估，我諗，女人選擇「姊妹」唔係一種友情，而有冇可能係愛情。
睇番「姊妹」既風質，充滿佔有慾、將對方既幸福既自己既幸福捆縛、極度害怕對方先傷害自己所以只好表面上過度付出。
結果一反臉就要對方死，只因兩個女人互相都付出太多，掌握住太多大殺傷力武器（是非同秘密）。
有種表面無堅不摧，實則脆弱不堪既友誼，叫做「姊妹」。應該係，好似係。

男士們仲有咩你諗極都唔明歡迎留言一齊發問，女士們有咩唔同意可以入黎討論下。
柳臣 fb page，等你入黎一齊傾！如果想睇到更多男人永遠搞不懂女人的事，就記得like同share篇文支持柳臣～

延伸閲讀：
一百樣男人永遠搞不懂女人的事？│化妝真係需要咁多野?│〈３〉
一百樣男人永遠搞不懂女人的事？│為什麼女生愛結伴去洗手間？│〈２〉
一百樣男人永遠搞不懂女人的事？│為什麼女生的（房間／袋）可以這麼亂？│〈１〉