養車到底有幾貴？買車前要諗清楚！

人人都話香港地養車好貴，但你又知唔知養一架車實質要幾錢？如果心大心細諗緊好冇買車，就快啲睇下MoneyHero幫你計既每年養車支出，再決定啦！

雖然養車比較貴，但無可否認係有好多好處。例如你返工地方冇港鐵站，或者經常要去啲轉幾次車先去到既地方，有私家車就會方便好多。不過，諗緊買唔買車既時候要記住，養車係長命數，要計清楚先好決定。就算好好彩冇發生過交通意外、又冇壞車，都有唔少固定使費。

油費、清潔費、維修保養、保費等等定期既支出加加埋埋都可以好大筆錢。即使你好錫車，揸得耐左總會有啲磨損。加上折舊既關係，就算你架車KEEP得幾好，都冇可能用本來既價錢賣返出去。
所以考慮買唔買車既時候就要計清楚條數，避免大失預算。除左換機油、牌費等等既支出之外，你每日大約揸幾遠、塞唔塞車、有冇其他公共交通工具可以搭，都會影響值唔值得買車。如果計過所有支出，又覺得應付到既話，咁就可以升級做車主啦！