經典港產格鬥遊戲──《小朋友齊打交2》

《小朋友齊打交2》(Little Fighter 2, 簡稱LF2)，我細細個就聽過呢個名啦，當年筆者同班中學同學上電腦堂上到悶悶地就會download呢隻game落黎玩，又或者一放學就同friend一齊衝到電腦霸位打LF2，有時甚至會擠逼到四個人八隻手放係個鍵盤度一齊玩，而家諗返起個段時光都令我感到非常開心同難以忘懷。講到呢度，大家又知唔知呢隻game既來頭係點?如果唔知就等筆者介紹下比大家知啦!《小朋友齊打交》係一款免費既2D格鬥遊戲，第一版同第二版分別係1995年同1999年推出，遊戲開發者為兩位中大計算機科學系學生王國鴻(小熊)同黃浩然。LF2一共有24個角色比你揀，有d角色要入密碼先有得揀架，例如最屈機既「邪鬼」同「冰火佬」等等。至於遊戲模式就總共有對決、闖關、戰爭同淘汰賽四種(詳細介紹可以睇官網)，《小朋友齊打交》既玩法同操作都非常簡單，對電腦設備等級既要求唔高，而且仲要係免費，所以深受冇咩零用錢洗既中小學生歡迎。《小朋友齊打交2》入邊既角色都有好多特別之處，例如「冰佬」同「火佬」得返少少血時可以合體成為勁屈機既「冰火佬」;俗稱「鐵甲佬」既Louis打到冇咩血時可以爆甲變成速度更快同攻擊力更強既LouisEX;「箭佬」吹笛個陣那怕係最強既「邪鬼」同「冰火佬」都要不由自主地飛上半空。講到最屈機既角色當然係先前已經提及既「邪鬼」，佢既「連環重炮」攻速極快而且又有追蹤能力，另一招「邪閃波」速度快兼且難以抵擋(P.s「箭佬」既降龍掌、Louis既「鳳凰展翅」、和尚既「密宗大手印」同魔法師John既防護壁可以勉強擋到「邪閃波」，但會引起爆炸，如果企得太近爆炸範圍都會受到傷害)，筆者認為「邪鬼」既剋星係「箭佬」，因為後者可以用吹笛去牽制前者。至於第二強既角色當然係「冰火佬」啦，佢招「天厄滅絕」會射出好多冰球同火球上半空然後俯衝攻擊對手，對手難以閃避漫天花雨落下既冰火球，即使比你衝到埋身佢都可以用一招「極地火山」將你一野轟開。正因為「冰火佬」攻守兼備，佢就成為左筆者最愛既角色。《小朋友齊打交2》係港產遊戲，所以遊戲就自不然包含左一d香港特色，好似其中兩個遊戲背景分別為鑽石山既大磡村同開發者既母校──中文大學，呢兩個為港人熟悉既地方令玩家感到親切，玩起上黎就更加投入啦!

其中兩個遊戲背景分別為鑽石山既大磡村(上圖)同中文大學(下圖)
時至今日，《小朋友齊打交2》都差不多有廿年歷史，呢廿年黎亦衍生左不同版本既LF2甚至online game，但筆者認為original既LF2先係最好玩同最經典。直到而家，大家都仲可以上官網download呢隻game落黎玩，縱然聲勢已經大不如前，但筆者衷心希望呢隻陪伴住我地成長既《小朋友齊打交2》可以一直同我地繼續走下去。

仲等!快快手download返落黎玩啦!!!

官網:http://www.lf2.net/index_b5.html