【經典回顧】恐怖欠奉但溫情滿載──《奇幻潮》之媽媽愛你四小時

貧僧相信唔少八、九十後既讀者都有睇過《奇幻潮》，呢個經典節目有二十二個唔同既靈異故事，例如膾炙人口既《四人歸西》，呢個故事令到唔少人係打麻雀既時候都覺得心驚膽跳，寧願冇糊食都唔夠膽打隻「西」同「一筒」出黎！《奇》每集既故事基本上都係同靈異既典故有關，但令貧僧最深刻既一集就必定係第十四集既《媽媽愛你四小時》，因為呢集劇情出奇地沒有任何恐怖既元素，反而充滿住溫情母愛，令到唔少觀眾睇完都為之動容，所以貧僧對呢集既內容就感到十分深刻！

故事講述單親媽媽周太(薛家燕 飾演)因為患上腎病而命不久矣，正當周太擔心自己死後而冇人照顧三個仔女之際，來自地獄既勾魂使者Joe(蔣志光 飾演)就係呢個時候出現，Joe告知周太只剩下四小時既壽命。

周太自知自己時間無多，所以便盡力滿足三位子女既要求，她拖著疲憊不堪既身軀去教兒子做功課，跑到老遠去香港仔買魚蛋煮比細女食，係買菜既時候仲差d體力不支暈倒，但周太依然靠住意志支撐下去，為既只係想同家人食最後一餐。

大女平時十指不沾陽春水，為左煮最後一餐比母親食而搞到廚房手忙腳亂。

一家人坐埋一齊食飯，幾個仔女都知道媽媽命不久矣，所以食飯個陣個個都忍唔住喊左出黎，阿Joe試左口水蛋之後竟然感動落淚，幾百年來見盡生離死別既佢見到此情此景都第一次流下眼淚，莫非呢d就係親情既力量？

時辰到，縱然勾魂使者為周太一家感到難過，但職責所在，佢都不得不帶走周太，周太含淚跟三位子女道別後就跟左Joe行出去:

或者Joe真係動左真感情，佢表示自己等左周太四個鐘，自己亦都要周太等番佢四個鐘，正當周太以為自己有多四個鐘壽命陪仔女之際，Joe就表示靈界既一個鐘就等如人間既十年，換言之周太仲有四十年命，唔洗死大團圓結局！

家燕媽媽和蔣志光的演技出色，使角色的形象更立體，也令到短短廿分鐘的劇情都能掀動人心。貧僧亦覺得大家都要珍惜眼前人，正所謂「最心痛是，愛得太遲」，大家要記住要多點關心身邊的人哦！