見家長，最緊要夠自然。
如果要我數拍拖入面最令人恐懼嘅事，見家長應該穩奪第一。想當年第一次喺女朋友屋企有人嘅情況之下去佢屋企，心情重緊張過考會考聆聽聽住綠袖子嗰陣：又怕電話自動連Wi-Fi啦、又怕隻狗飛撲埋嚟好耐冇見我咁、最怕嘅係見到伯母都唔知講咩好。當女朋友打開門，我行入去一見到伯母就企到直一直，雙手拎住盒女朋友提議我買嘅朱古力禮盒，然後講咗句「伯母你好，小小意思」。之後係點我都唔係好記得，大概係佢叫我坐就坐，企就企，問我一句答返佢一句咁，總之全程我都坐到見工咁樣一刻都唔敢鬆懈。後來見多幾次又食過兩次飯咁先至冇咁緊張，不過伯母喺度我連同女朋友Good Bye Kiss都唔敢，因為聽女朋友講伯母都管得幾嚴，夜街都唔比出嗰隻。
以上係我第一次見家長做嘅嘢，基本上全部都係負面教材。你如果仲係十八二十嘅學生都可以接受，兩小無猜細路仔唔識嘢嘛，伯母唔會點介意嘅；但如果廿幾歲出到嚟做嘢都仲係咁就有啲失禮。要同你女朋友關係融洽，除咗要氹得女朋友開心同照顧到佢，愛屋及烏都唔可以忽視，特別你若果你想同女朋友踏入人生新階段嘅話，冇佢父母同意甚至佢父母唔鍾意你嘅話基本上冇可能成事（奉子成婚又另一回事，你可以搏下嘅）。咁喺一個老一輩眼中嘅好仔定義大部份都係伯同長輩傾計啊，有禮貌又會主動幫下手咁，只要你可以融入到佢地生活，唔好當自己係一個外人咁生外，基本上佢地對你嘅印像都唔會太差。吸取咗依一次經驗之後，另一次拍拖見家長嗰陣我以為會好啲，就識點樣放鬆小小心情啦，但結果係同我諗嘅完全相反。
話說今次我同佢拍咗三日拖就去咗見佢家長：伯母生日，女朋友叫我幫手拎蛋糕上去，我冇理由托手肘架。問女朋友買咩比伯母好，結果佢同我一樣咁苦惱，最後決定去一田買盒禮盒士多啤梨，三百幾蚊貴到痴孖根嗰啲，反正買生果比長輩九成九都冇死。上到去個茶舞廳（冇錯，真係茶舞廳，唔知係咩就搵下GOOGLE啦）發現伯母根本就係相識滿天下，大半個場嘅人都識佢，大家一知佢個女帶男朋友上嚟就好似襯墟咁走埋嚟睇熱鬧，結果成個場我淨係記得伯母一個，嗰啲咩姨咩叔乜姐乜伯我記都記唔切。喺我自我介紹咗幾廿次，「係啊係啊」咁過百次之後，終於到切蛋糕依個環節，身為佢寶貝女男朋友嘅我當然係企喺壽星附近。由於人太多嘅關係大合照都差啲影唔哂，然後無論我行到邊甚至去廁所都會有人問我「係咪啊邊個嘅女朋友」，然後又捉住我傾下幾句，又講皮膚到睇掌相包羅萬有。去到最後我淨係想坐埋一邊食嗰個得個樣靚嘅生日蛋糕，因為我諗都冇諗過第一次就見哂成個家族連伯母嘅朋友都認識埋。
雖然第一次見家長就咁大陣像，但反而之後同女朋友仲有伯母一齊出街就好正常，甚至可以稱得上舒服。由於伯母比較開通，我仲記得有一日我地三個睇完戲食完飯同糖水，之後居然係帶住伯母同女朋友去食水煙。咁你知啦，兩杯酒落肚係人都熟架啦，嗰晚傾咗啲咩我就真係唔記得，但當同伯母食水煙都冇問題，日後仲有咩環境你會擔心？我直頭可以當伯母係朋友。
未必每位伯母都好似我頭先講嗰位咁玩得，可能有啲好古板，又或者好重傳統觀念。但任何人表現最好嗰陣都係處於一個自然同埋舒服嘅狀態，你想對住伯母唔會痴利筋，你想對住班長輩唔會多做多錯，只要做番平時嘅自己就可以。唔好當伯母係老師，唔好當見家長係考試，佢地只係想知你錫唔錫佢個女，然後歡迎你加入佢地成為家庭新嘅一份子。其實你女朋友帶得你上去，我諗佢一早已經同屋企人講好哂，亦都對你有信心先會咁做，所以見家長真係唔洗怕，只要你表現夠自然，大多數都可以有一個完美結局。
一個讚好，是對我的一點支持。
如果想分享給其他朋友的話，請標明出處並附上專頁網址。FACEBOOK：https://www.facebook.com/MOYINDAY
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材
以上係我第一次見家長做嘅嘢，基本上全部都係負面教材。你如果仲係十八二十嘅學生都可以接受，兩小無猜細路仔唔識嘢嘛，伯母唔會點介意嘅；但如果廿幾歲出到嚟做嘢都仲係咁就有啲失禮。要同你女朋友關係融洽，除咗要氹得女朋友開心同照顧到佢，愛屋及烏都唔可以忽視，特別你若果你想同女朋友踏入人生新階段嘅話，冇佢父母同意甚至佢父母唔鍾意你嘅話基本上冇可能成事（奉子成婚又另一回事，你可以搏下嘅）。咁喺一個老一輩眼中嘅好仔定義大部份都係伯同長輩傾計啊，有禮貌又會主動幫下手咁，只要你可以融入到佢地生活，唔好當自己係一個外人咁生外，基本上佢地對你嘅印像都唔會太差。吸取咗依一次經驗之後，另一次拍拖見家長嗰陣我以為會好啲，就識點樣放鬆小小心情啦，但結果係同我諗嘅完全相反。
話說今次我同佢拍咗三日拖就去咗見佢家長：伯母生日，女朋友叫我幫手拎蛋糕上去，我冇理由托手肘架。問女朋友買咩比伯母好，結果佢同我一樣咁苦惱，最後決定去一田買盒禮盒士多啤梨，三百幾蚊貴到痴孖根嗰啲，反正買生果比長輩九成九都冇死。上到去個茶舞廳（冇錯，真係茶舞廳，唔知係咩就搵下GOOGLE啦）發現伯母根本就係相識滿天下，大半個場嘅人都識佢，大家一知佢個女帶男朋友上嚟就好似襯墟咁走埋嚟睇熱鬧，結果成個場我淨係記得伯母一個，嗰啲咩姨咩叔乜姐乜伯我記都記唔切。喺我自我介紹咗幾廿次，「係啊係啊」咁過百次之後，終於到切蛋糕依個環節，身為佢寶貝女男朋友嘅我當然係企喺壽星附近。由於人太多嘅關係大合照都差啲影唔哂，然後無論我行到邊甚至去廁所都會有人問我「係咪啊邊個嘅女朋友」，然後又捉住我傾下幾句，又講皮膚到睇掌相包羅萬有。去到最後我淨係想坐埋一邊食嗰個得個樣靚嘅生日蛋糕，因為我諗都冇諗過第一次就見哂成個家族連伯母嘅朋友都認識埋。
雖然第一次見家長就咁大陣像，但反而之後同女朋友仲有伯母一齊出街就好正常，甚至可以稱得上舒服。由於伯母比較開通，我仲記得有一日我地三個睇完戲食完飯同糖水，之後居然係帶住伯母同女朋友去食水煙。咁你知啦，兩杯酒落肚係人都熟架啦，嗰晚傾咗啲咩我就真係唔記得，但當同伯母食水煙都冇問題，日後仲有咩環境你會擔心？我直頭可以當伯母係朋友。
未必每位伯母都好似我頭先講嗰位咁玩得，可能有啲好古板，又或者好重傳統觀念。但任何人表現最好嗰陣都係處於一個自然同埋舒服嘅狀態，你想對住伯母唔會痴利筋，你想對住班長輩唔會多做多錯，只要做番平時嘅自己就可以。唔好當伯母係老師，唔好當見家長係考試，佢地只係想知你錫唔錫佢個女，然後歡迎你加入佢地成為家庭新嘅一份子。其實你女朋友帶得你上去，我諗佢一早已經同屋企人講好哂，亦都對你有信心先會咁做，所以見家長真係唔洗怕，只要你表現夠自然，大多數都可以有一個完美結局。
一個讚好，是對我的一點支持。
如果想分享給其他朋友的話，請標明出處並附上專頁網址。FACEBOOK：https://www.facebook.com/MOYINDAY
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材