費格遜：英足總應該追罰蘇亞雷斯插水；我以前曾經教過C朗唔可以插水！

蘇亞雷斯係最近接受南美傳媒訪問時，佢表示自己係足總盃對曼斯菲既手球係無心，但佢就承認舊年9月對史篤城時，插水而獲得十二碼，並且批評曼聯控制左英國傳媒，呢件事就連利物浦領隊羅渣士都非常嬲，並且認為插水係唔可以接受，但據《衛報》透露，利物浦唔會內部處罰蘇亞雷斯，而英足總亦宣佈唔會對蘇亞雷斯插水一事秋後算帳，但費格遜就認為英足總同利物浦一定要為呢種行為(插水)作出處罰。
費格遜：「今個星期既教練會上我地討論過蘇亞雷斯承認插水一事，依家插水會有啲咩處罰？應該係球會定係足總去處罰？我認為足總處理今次事件有問題，因為係由佢地制定罰則標準，佢地一直都係話證明唔到蘇亞雷斯係唔係故意插水，所以就唔罰佢。足總唔罰蘇亞雷斯，唔通真係要利物浦罰佢地自己球員咩，我諗最後呢件事都會不了了之。我唔清楚蘇亞雷斯接受採訪時候，講過啲咩，我只係由報紙見到，佢承認自己插水。」
費格遜再次指出係外國球員令到英超插水風氣盛行，包括當年既C朗，費Sir表示：「我一定教好自己既球員，我曾經對C朗講過叫佢唔好插水，佢個陣仲係個後生仔，或者要幾年時間先知插水既幣處，但係我提完佢之後就再無插水，但我認為英超太多外國球員，所以就令到插水風氣盛行。」
同一時間，英足總宣佈處罰係足總盃重賽之後批評球證偏幫曼聯既艾拿戴斯，佢批評球證係相同手球既情況下只係俾曼聯十二碼，但就對韋斯咸應得既十二碼視而不見，英足總表示艾拿戴斯可以係1月23號之前上訴。