蟲筆感想 睇波日記（三）

2月5日 星期二

又經過一日睡眠，我就起身離開倫敦（其實我諗，一間房六個床位，難得令我瞓得舒服），係附近超市買早餐食（麵包香味總會令人精神）。食完早餐後，我決定放棄坐地鐵去柏丁頓車站，改為行路（點都好，係香港坐地鐵都做開沙甸魚，係英國，行得既都會行下。起碼真係唔會覺得迫同趕。）。行到去火車站，第一時間要交水費（剛好，廁所維修中，免費😅）。之後向威爾斯出發。原先計劃今日北上去睇約克城（前紐卡素守衛屈臣「Steve Waston」執教）比賽，但見到我愛隊作客紐波特郡的足總盃重賽賽事，二話不說在官網售買門票。其後我電郵詢問如何取得門票，他們回覆我只需要到現場領取。乘坐火車到紐波特郡，第一眼會見到車站顯示英文語言外，亦有威爾斯語言（唔明有D地方，一定要滅。最仆街係，「自己」人幫手滅。）。落車後，就行去朗迪尼球場（Rodney Parade，紐波特郡主場同欖球隊共用一個球場）領取門票。點知⋯佢話無，紅髮姐姐話，波飛寄哂去米杜士堡（😟玩鳩我）。跟住我同紅髮姐姐講，我同個邊聯絡，夜D再來。之後我行去市中心，享受炸魚薯條同時，同米堡職員email聯繫，佢地回覆叫我去返個邊拎，但我同佢講，呢邊無😅。而佢最後補充一句，你五點後可以去拎，我有禮貌咁多謝佢耐心回覆（心諗，仆你個街，你唔早D講）。之後去酒店Check In，㩒鐘又係無人應門，點知⋯門口係另一條街（佢比我地址係後門😒）。之後入酒店就放低行李，輕輕鬆鬆睇下電視。五點過後，我就行返去球場，紅髮姐姐見到我就叫我去拎票，我同佢講，佢無話我知幾點拎，我差D買企位去買波，她係到笑。之後去作客場區等待入場，其間有位女士問我係邊到來，我同佢講香港來。佢即時問我識唔識米堡球迷會既人（香港）？我同佢講識，亦傾左兩句（後來問返TF「米堡球迷會揸Fit人😎」，原來佢係Boro Fans Tv老闆來），之後傾閒計，仲叫我享受今場比賽。經人手式點票入場後，觀看四周環境，對上一次去錫菲足球隊（Sheffield FC）參觀球場，今次正式比錢入場睇波。我坐位置係東面接近南看台，雖然有瓦遮頭，但風無定向的雨，吹到我由頭落腳，同坐南看台無分別。北面看台以企位為主，價錢較為便宜。呢場米基爾亦隨隊出征（沒有落場），而球隊都以主力球員為主，大概想以重賽來操練狀態。開波不久米堡搶攻，可惜比對方門將一一瓦解。其後紐波特郡企穩陣腳後，開始取得主場優勢。畢竟球場偏細及場地開始變得泥濘，而紐波特郡不斷走動亦令米杜士堡受壓。隨著雨勢一直有增無減下，感覺失球只係時間問題。結果韋莫特及阿莫特入球，協助紐波特郡領先。老門將迪米（原名：干斯坦杜普路斯）一臉茫然。結果賽果直到完場，南看台部分球迷不滿情緒發洩在球員身上，後備入替的基斯泰迪回敬出言不遜的球迷。結果西漢台為首紐波特郡球迷，帶動主場球迷唱英格蘭世界盃的主題曲（Don’t take me home），鎮撼整個球場。同我地數百名球迷低頭離去，形成強烈對比。在英國睇波，以往只在主場觀看多，作客屬唯一一次。希望往後機會能隨愛隊作客（需要長時間），唯一失望，應該係輸波。而勝出的紐波特郡，將於主場迎戰曼城。
在Camden Town（倫敦）附近街景。

早餐係基本必備。😋

向威爾斯出發！

在威爾斯地區，必定有英文及威爾斯文。

紐波特街景。

炸魚薯條😋你地鍾意落咩醬？我就鍾意落醋。

紐波特郡主場平面圖（足球及欖球），今日作客區在南看台及東看台G區。
暫時人生中的第一張作客波飛。

未落大雨前，草地都係靚。

南看台螢幕。

開始大雨，影相都開始有難度。

米杜士堡球員榮治開出角球。

派糖啦。😀

下半場開波！

球場中間開始變泥⋯