蟲筆感想睇波日記（七）

2月12日星期二

由倫敦返回曼徹斯特的我，在宿舍整理下文章，係附近行下。等待夜晚的賽事，今晚週中除英格蘭本土有快車外，歐聯賽事同時上演。今日決定睇呢場重頭戲，曼聯對巴黎聖日門。街上早早有很多小販售賣賽事紀念品，同時有不少來至巴黎球迷到市中心遊覽。話說歐聯波飛曼聯官網早已比季票會員買哂（普通會員想買都難🤦🏾‍♂️），而黃牛黨同波飛網食水深（😒🖕🏾）。結果我係官網睇下邊個package比較好，最後我唔要酒店，選擇做一日VIP啦。係網站入面，好多係廂房都幾乎爆滿。退求其次選擇位於草地板球場，雖然同球場有少少距離，但不失為一個好地方。呢日我決定穿著少有的恤衫，做下靚仔先。下午接近5點時，好多人排隊進場，每位進入廂房球迷都要出示身分証明文件先獲得波飛及入廂房証件。上樓後由職員安排坐位，眼見除死忠球迷外，亦有我呢類旅客。二話不說第一時間飲下香檳放鬆下，睇下餐牌有咩食，之後同身邊既客人傾下計，飲下酒（結果自己越飲越多😁，基本紅酒、白酒、樽裝啤酒、生啤、香檳、汽水係任飲，烈酒就要自費）。同時見到穆倫史甸（René Meulensteen）係到同球迷打招呼，傾下波經，最後更親自同每位來賓影相。飲飽食醉過後就起程往夢劇場，奧脫福球場。沿途有小販檔、小食店，唔怕會悶。行到奧脫福球場（除參觀導賞團外，第一次入場睇曼聯係史高斯告別式賽⋯點知半季復出，仆你個街），氣氛比想像中濃烈。周邊球迷係到唱歌，影相。而我都唔客氣咁影相，之後排隊入場，行上兩層樓到坐地方。雖然無法近睇，但高處望下可以觀賞整個主場，而作客區正正係我左下方。繼09年當時睇車仔歐聯分組賽後（個陣係排隊買飛），第二次現場睇歐聯。歐聯首主題曲我幾鍾意，雙方球員入場，主隊球迷熱烈歡呼。報告員不過一講迪馬利亞（Angel Di Maria）就噓聲四起，當然雙方都唔鍾意大家。球證一吹雞開波，作客區球迷就放煙花，不過我到而家都唔鍾意煙花。上半場雙方拉成均勢，而楊格（Ashley Young）對迪馬利亞一個攔截，將後者撞向廣告牌，曼聯球迷隨即熱烈鼓掌。其後迪馬利亞準備開角球，球迷掉樽入場，迪馬利亞居然扮飲回敬球迷，更多一層火藥味。下半場曼聯因兩名球員受傷而換人，或許換來輸波伏筆。巴黎後衛憑甘柏比（Presnel Kimpembe）頭鎚先拔頭籌，其後麥巴比（Kylian Mbappe）射入迪基亞（David De Gea），曼聯無力還拖。不過我附近就發生麻煩事，有作客球迷入波慶祝引起主場球迷不滿，欲衝前理論時，保安人員隨即分隔佢地，拉走該名作客球迷，點知佢仲係到搞嬲其他球迷，保安人員就唔覺意中左佢一樣（做得好😏）。其後巴黎偶有攻勢威脅，曼聯無還手之力，即使最後數分鐘換入盧卡古（Romelu Lukaku）都無補於事。結果首回合，傷兵滿營的曼聯輸掉比賽，而作客區的巴黎球迷則大肆慶祝。而觀賞最後一場賽事，今年睇波就完滿結束，至於幾時再睇，就未知住。

後感

呢幾篇野，寫下自己睇波既野同身邊多。資訊性可能唔多，如果你問我想體驗睇波現場氣氛的話，我建議由低組別或本地球迷多睇。畢竟球迷凝聚力較強，仲可以了解當地文化。在官方網站訂購波飛後，如果佢無寄來香港（我睇韋斯咸個張佢就寄來，有部分球隊都會寄平郵來香港），你就要親自係球場到拎（記得要帶護照，因為有機會檢查是否你本人。）

蟲筆感想 睇波日記（七）

如果喜歡我們的文章，請即分享到︰

蟲筆感想睇波日記（七）