球迷門派檢閱 (一) : 浪漫派

球迷，只係一個統稱。就好似武術咁，其實球迷都有分唔同門派。

知唔知你同你身邊既波友係邊一派？

呢幾日，同大家輕鬆數數不同門派~ (排名不分先後)

1. 浪漫派

所謂浪漫，其實意指超乎理性。就好似愛一個人，係絕對非理性既行為。

而籃球既浪漫派，其實就即係死忠。

當你問一個死忠點解鐘意一隊球隊, 佢好可能會即刻上晒身咁同你如數家珍咁講隊波有咩特質, 有咩威水史。
總之你聽完之後一定唔會有佢盲撐隊波既感覺。

但現實係, 宇宙間任何一隊球隊，下列既所有部份都鐵定會於時間洪流間改變 — 球員會變，教練會變，總裁會變，球隊文化會變，班主會變，更衣室阿姐會變，保安叔叔會變，吉祥物會變........
換句說話講，一個球迷講得出佢鐘意隊波既野，都一定會變。一個死忠所目睹既變更, 亦肯定最多。咁一個球迷所鐘意既野都已經改變，甚至唔存在，咁繼續支持既邏輯究竟係點? 但死忠係唔會理，會繼續堅定支持。完美演繹了 「天變地變情不變」。

呢一份情，除左浪漫，筆者實在諗唔倒更好既形容。

*其實有一隊波，有一個部份係最小機會改變 — 球衣顏色。所以某程度上，死忠係對一隻顏色既忠誠同執著。*

#Tag 身邊一個浪漫派球迷

*如果筆者係女人, 揀老公一定揀有支持特定球隊既死忠。*

*筆者以前既世史科老師講過: 浪漫, 俗啲既表達, 其實即係戇居*