最緊要唔好驚! 女生獨遊小貼士

我曾經獨遊非洲歐洲美洲亞洲不同大小的國家，從第一次既興奮又緊張，到後來每年一次的出遊， 我漸漸明白到獨遊可能係一種therapy, 每一次都係重新認識自己, 解放潛能嘅機會。 正所謂試過先講，未試過嘅又點知啱唔啱自己呢？ 蠢蠢欲動嘅妳，獨遊有咩小貼士？

定啲嚟，唔洗驚
女生獨遊成日都畀人話：「危險呀,唔好去呀。」唔好意思，其實做乜嘢都會危險，你出街都有可能會被車撞（絕無詛咒既意思）,其實女仔獨遊，只要夠細心，做足行程準備，唔好做傻事，其實冇乜嘢難到你。

好似一個女仔出街食飯，難免會俾人搭訕，但呢個時候請相信你嘅第六感，如果呢個人比你嘅感覺唔好，禮貌拒絕已經可以，正常人通常識做。 最重要唔好show到你好驚青, 一驚就弊，有心人反而想食住上。

揀間有信譽嘅酒店
而家好興民宿，airbnb，青年旅舍等等，但係自己出遊嘅時候，其實最好揀番啲有信譽嘅國際連鎖酒店。原因係，如果第一次去嘅話，人生路不熟，連鎖酒店起碼佢哋嘅服務質素會有保證，你唔需要煩貨不對辦，保安等等嘅問題，而佢哋通常會有24小時front desk, 需要協助嘅時候通常都幫到你。

曾經去緬甸嘅時候，第一晚因為要駁清晨機，所以揀咗一間好平嘅青年旅舍，諗住擺低行李瞓一陣，沖個涼就去機場。點知嗰度唔單止瞓瞓下停電冇水，清潔程度又差，而且房門係鎖吾到（當時訂單人房）。最後冇辦法之下，我提早check out, 寧願去機場坐住等天光。

Plan埋交通時間
第一次去一個地方，當然想到處玩，博物館、餐廳、觀光、行街等等，有冇諗過要plan埋交通時間？如果有能力，揀一間喺旺區嘅住宿會係一個唔錯嘅選擇，因為旺區通常可能係市中心或者鄰近地鐵，比較近啲觀光地點，可以慳番好多搭車轉車嘅時間，而且夜晚出去食完飯之後，返酒店亦都會比較方便。

另外，check定開放時間都好重要。每個國家都有唔同嘅生活習慣，例如阿拉伯國家係星期五、六為週末，歐洲國家好多星期日未必開舖等等，唔想白行一趟，就最好check定開放時間， 需唔需要預約等等。


善用手機上嘅app
女生出去玩嘅時候，最好唔好帶太多一袋二袋出去，一來比較笨重唔方便，二來其實手機有好多app可以用，例如Google Map 可以代替地圖，仲建議埋交通路線， 簡直係出遊恩物。 其他例如TripAdvisor 同 Yelp 之類，都可以知道某某餐廳，某某地點值唔值得去，夠唔夠地道，服務好唔好等等，非常好用。


持開放態度對待任何人與事
香港的確係一個好方便嘅城市，好多時香港人亦都畀佢嘅高效率寵慣咗。出遊嘅時候會發現其他地方相對無咁方便， 或者人比較慢嘅時候，最緊要持一個開放嘅態度去看待。要記住我哋只係一個遊客，佢哋係喺嗰度生活，每個人都會有自己嘅風土人情難處， 多一份包容，有問題嘅時候深呼吸一啖，你就會發現問題其實冇想像中咁難處理。 最重要嘅係你得自己一個，打交都無氣勢！
之後再講下其他旅遊趣聞，祝大家早日有得飛✈️