每年11月，英超波衫都會多左朵花

唔知大家有冇留意，英超球隊每年去到11月，件波衫都會繡多一朵紅色花仔？呢朵紅色花仔，叫做虞美人花(poppy)，象徵紀念戰爭中陣亡既士兵同死難者。

1915年，第一次世界大戰期間，加拿大軍醫John McCrae在比利時寫左首詩《In Flanders Fields》，紀念陣亡戰友，首詩第一句就提及到作者喺墓地見到紅色既虞美人花。1918年11月11日，一戰宣佈結束。一年後，英皇佐治五世喺停戰一周年當日，紀念戰爭中犧牲既士兵同平民。於是，11月11日，就被後世稱為和平紀念日(Remembrance Day)。

時至今日，和平紀念日唔單止係紀念一戰既死難者，仲包括埋二戰以及其他戰爭。詩作《In Flanders Fields》提到既虞美人花，就成為左紀念逝者同寄望盼望和平既象徵。喺11月，英國人民會喺衣服上戴上虞美人花配飾以作紀念。英超球隊亦喺球場上繼承左呢項傳統，舉行賽前紀念儀式、着上繡左虞美人花圖案既波衫，以及換上有虞美人花圖案既球會會徵做profile picture等。