2017，省港盃首回合後記

港隊B隊出戰省港盃，賽前有部份主力退隊，可謂「半力出擊」。首回合有陳俊樂同黎洛賢兩度追和之下，最後輸2-3，算係有驚喜亦都有失望啦。
講咗抵讚嘅幾位先：

陳俊樂：著起件港隊波衫真係打高一班，基本上港隊中場大部份串連同組織都係由佢主導 (尤其係上半場)；後上進攻同樣有貨交，追和一球或者有少少幸運成分，不過撞射嘅一腳就絕對係質素嘅表現。

黎洛賢：右路攻勢唔算多，加上好多時都係黃俊皓後上助攻之下，實質掂波時間又唔係咁多。不過上半場一次左腳出波幾乎得手，同埋下半場接應右路傳中右腳窩利都同樣有質素，算係進攻端嘅其中一個亮點。

胡晉銘：呢個真係今場最大得著，19歲仔喺飛馬已經俾人讚踢得好淡定，第一次幫港隊踢省港盃一樣冇怯場。後備入替之後，無論防守搶截、定係駁腳分波都有表現，有拼勁之餘亦非常穩陣。樂仔有佢幫手之後，港隊中場嘅搶奪亦冇上半場咁輸蝕，假以時日相信會係接替港隊中場主力嘅人選之一。
講完抵讚，就梗係講抵插啦...

防守集中力：其實三球失波都可以話係輸一樣嘢，走漏人。第一球死球跟甩咗廖均健，之後兩球補射都係冇mark實人之後俾人執雞，如果集中力好少少的話，其實都有機會唔使輸。另外上半場失波之後有一次成條防線失晒魂，應該都嚇到各位球迷㩒晒平安鐘。

林學曦：踢單箭頭又控唔到波，有時走到啲空位係有威脅不過又冇人接應，除咗有一球射空門俾羅足慶回身救出之外，存在感其實唔算高。下場可唔可以試下許嘉樂？

中堅媽寶：睇到各位球迷媽聲四起嘅，應該都係張志勇同李毅凱呢兩個中堅。張志勇搶高空波又搶輸，一球直線就放甩，單對單輕鬆被扭；李毅凱又係失晒魂，上半場有球回傳幾乎出事，另外一次無謂嘅犯規又搞到攞黃牌。如果兩位想挑戰基藍馬呀、法圖斯呀、羅素呢啲歸化球員呢，就麻煩你地再落力啲爭啦。

方栢倫：我真係唔知講咩好，你除咗直線盤球帶波出界，同埋傳中斬俾龍門之外，仲有咩係識做架？

人腳質素同默契所限，呢隊港隊嘅防守能力同埋個人嘅進攻能力確實係冇一隊咁好；不過其實以觀賞性而言，呢隊港隊嘅控球組織又的確有啲驚喜，尤其係談樂軒、樂仔呢類肯用波嘅球員。當然要挑戰宜家嘅大港腳，佢哋仲有好多嘢可以改進，攻守轉換過慢、身體質素差呢啲通病，真係不必多說，但係今日出戰省港盃，又確實俾到球迷少少驚喜。一月四號晚，呢隊港隊值得大家入場。