港漫 · 講漫

你有無睇過漫畫？佢有乜好睇呢？又唔似動漫咁有聲有畫咁爽快直接; 又唔似小說有文字咁噤有內涵修養，咁有想象空間。但佢偏偏有好多人睇，不但搣甩咗不良刋物呢個稱號，直情登上殿堂成為受萬人追捧嘅神物。鍾意佢嘅年齡層亦都好闊，追隨同一部作品嘅年齡層可以由幾歲至幾十歲，有時呢班粉絲好多都好鬼忠心。我聽過有粉絲話每次有新書出都會買兩本，一本收藏一本睇。有啲粉絲直情鍾意到自己落手畫，甚至做埋漫畫呢行。
漫畫呢樣嘢真係好奇怪，佢介乎係動畫同小說之間，可能佢係進化出嚟嘅文化產物。維基百科有料到:

漫畫（英語：comics）是一種二維視覺靜態圖畫藝術，構圖（如顏色、線條運用）一般比美術繪畫（如油畫、水彩畫）精簡，可以加上文字（如對白、旁述、狀聲詞）構成內容。如同其他藝術形式，漫畫可以運用不同的敘事手法，例如誇飾、諷刺、寫實等。

連環漫畫以多張靜態的圖畫構成，與動畫有別。通常沒有聲音，有聲音的例子有「配圖廣播劇」(vomic)。漫畫可以完整地敘述事情 敘述故事。

「漫」字有着連綿、長遠的意思，如漫長、漫漫等；且有簡易的、隨意之意，如漫談、 漫步等。故「漫畫」可被視為不拘於例如油畫等作畫技巧上的仿真及嚴謹豐實，而以敘事及描形為主的作畫風格。非單幅的漫畫也可以稱為連環圖、連環畫。
嘩！眼界大開。原來，漫畫係一種連綿，隨意嘅二維視覺靜態藝術。一般人對漫畫最普遍嘅睇法可能其實係就連環圖。不如揾幾本望下。

呢本係漫畫界嘅起朵之作，鼻祖，作者佢可能係第一個因為寫畫賺到揸波子嘅香港寫畫佬，佢教識咗好多人乜嘢係911, 乜嘢係930。佢寫畫嘅風格，公仔嘅做型係一個年代嘅象徵。剩係蹚眉都成為經典中嘅經典。降龍十八腿，十字追魂棍，電光毒龍鑽，冰火五重天，一神二妖三長老四絕五奇六星座，嘩勁到呢……. 講唔掂，更加有人將冰火五重天同埋電光毒龍鑽轉化成真實嘅具體專業應用，大有可能一直繼續流傳後世。佢自資用呢本書拍埋電影，其他佢嘅作品又俾人拍成電視，開創香港漫畫界跨媒體嘅先河。稱呼佢係寫畫佬绝對無任何唔尊重嘅意思，反而係百份之二佰嘅尊敬，因為呢個係佢哋嘅自稱，係佢哋捱更抵夜創造奇蹟嘅尊稱。呢個老友我哋依家叫佢漫畫教父，佢本書係龍虎門。

又有一個寫畫佬，將漫畫較為不拘小節嘅畫功技巧重新定義，登上漫畫家嘅殿堂。佢會用素描，又會教識好多人知道乜嘢係精準經修訂嘅比例，甚至用埋影印機製造扭曲效果嘅技術，將相對寫實湛新畫功思維手法帶嚟香港漫畫壇，衝擊傳統。佢亦將港漫figure發揚光大搞到要成幾千蚊玩嘅嘢。今日佢已係Sir。突破創新就一定胆拖失敗犧牲，佢畫過風流，耍個醉拳，出過burce lee，拜托埋女朋友，先揾到佢嘅英雄，一個無名英雄更加一遇風雲便化龍。喺佢筆下你邂逅到美麗悲情嘅木修羅，又見到無樣無手但又型到噴汁嘅鬼僕，一掌打爆你嘅神醫老僕，Queen又走去做司令，四副墨超四套Michael Jackson黑西裝嘅一聯，笑爆咀嘅人型坦克，盲人協會師徒對決用諗唔用手創出無敵神技刀中不二，無悔三震重重矛盾劍傲中華，成就經典赤劍英雄大海無量。
仲有一個稱得上漫畫界嘅奇蹟，佢嘅畫功可以點樣形容呢？明就唔明，不過睇落就幾有計。佢可能係香港第一個明正言順打正招牌橋畫分工又賣到錢嘅漫畫從業員。佢俾咗個實例啟示出嚟，you can’t beat them, then join them. 自己有橋，不過畫功唔掂，揾個拍擋解決自身問題，唔會等死，不失尊嚴，胸襟同智慧都值得俾尊敬更值得尊敬嘅尊重。佢嘅胸襟又可以喺佢嘅分紅制度體現到。天火，雷動，美式cool爆造型，黑豹，鐵忠，有咁盡去咁盡，嗡回去你的糞便吧，佐敦嘅米高，仲有驚世绝招一手隊入你個口到直入底部將你反皮殺人手法，真係睇到就聞到嗰陣臭味; 熱愛海洋嘅肥佬，將啲大白鯊，藍鲸擺晒出嚟，cool。

型咗咁耐，講個畫功又係異數嘅，畫公仔畫下畫下又走咗去出報紙，報纸啲專欄呀，報道呀，又九唔搭八，無厘頭。無錯嘞，佢就係漫畫界無厘頭嘅始祖。搞看圖猜嘢有對聯柑蕉桔梨碌柚，雁鷲鵰狸獅狒; 猜運動有奔、走、行，田徑有跳高跳遠成績: 跳七哩同埋跳九哩，又成日揾到啲變種生物，好似龜頭狗嗰啲呀咁俾你開眼界。佢又推展咗傳頌後世嘅名句: 面容扭曲不定，五官走位。喺電影界有好多大師都希望將呢句說話或具體或抽象咁用鏡頭展示出嚟。呢份小文日報將無厘頭帶到一個文化嘅新高度。

香港漫畫有創造，有傳承，有演進，有再創造。只要有心又點會無人睇吖。港漫熱血無停過。