青出於藍 · 你懂的

青出於藍 · 你懂的
青出於藍，呢句成語有好多人識講，好多人以為自己好清楚知道呢句成語係點解，不單只咁，仲識埋下半句tim。

青出於藍勝於藍，意思即係老師教出嚟嘅學生仲叻過老師。同「教識徒弟無師傅」呢句有啲似，不過呢句就有啲貶意，形容個徒弟有啲反骨。

講返「青出於藍」，咁點樣青出於藍呢？又何以可勝於藍呢？究竟係青色赢咗藍色？定後青色係從藍色而嚟，啲人覺得青色比藍色更優勝呢？若然真係咁，咁又由邊個定奪青色比藍色更優勝呢？所以對於「青出於藍」呢句成語，其實究竟你知唔知佢講乜？

想知道，就試下由典故出處出發啦。呢句成語出自語本《荀子．勸學》：「……青取之于藍而青于藍，冰，水為之而寒于水。……」嗱嗱嗱，就咁多夠嘞。第一句就係「青出於藍勝於藍」嘅本句出處，好難令人明白點解呢句就代表老師教出一個比自己更優秀嘅學生。反而第二句就容易明白得多嘞。冰，係由水凝成嘅 ; 但係佢比水仲要凍。先唔講凍啲係咪優勝啲，起碼邏輯上係直線成立。即係make sense 囉。後人取用「青出於藍」而棄用「冰水為之」可能都係因為一個字 – 型。直接易明又點顯出佢博學呢？中國古學素來重意不重形。你睇啲水墨畫，詩詞歌賦，幾有詩意，幾浪漫呀。想體會呢份深意，就算捨易取難又何況。好！青就青嚟！
第一句青出於藍中的青指靛青，藍指蓼藍，青是從藍草裡提煉出來的，但顏色比藍更深。青係指顏色; 藍係指蓼藍呢種植物，佢本身係綠葉植物。

根據網上資料話，青色又稱綠藍色，是指介於綠色和藍色之間的顏色，波長大約為500-485奈米，青係喺藍草提取出嚟嘅顏色。古代製作靛青色的顏料需從蓼藍草提煉出來，但顏色比蓼藍草的更深。嗱，其實青色並唔係真係青色，古時中國人稱呼今日的藍色作「青」色，再精準啲應該叫「靛藍」。唔通因為咁，青花瓷從來見到嘅都係藍色？用嚟做染料嘅係蓼藍嘅葉，葉本身係青綠色嘅。葉入面含有一種叫「尿藍母」嘅物質，「尿藍母」係一種天然嘅藍色色素，遇水就會分解，再氧化後就會變成靛藍，可以用嚟染色。
有日本達人將佢用於近乎藝術水平嘅染織技術。首先將蓼藍葉切碎、發酵，做成名叫「sukumo」嘅染料。然後，喺sukumo中加入鹼水、石灰，做成液體狀。到天氣、鹼水嘅鹼度以及sukumo嘅狀態等達到自然平衡狀態時，水面就會出現藍色氣泡，呢啲就叫做「藍華」，意味著用於染織嘅蓼藍染液就大功告成嘞。

其實將衣服染成靛藍色嘅，係蓼藍染料中嘅一種桿菌微生物。桿菌附著喺布料上，通過氧化作用將布染成藍色。正因為微生物咁重要，所以對染液嘅呵護同照料係絕對不能怠慢嘅。當藍液嘅染色效果變弱時，加入一啲酒或麥芽糖，染液就能恢復活力。

每喺藍液中浸染一次，藍色嘅名稱都有所不同，從青白向青綠、淡青、灰藍、藍、藏青、紫青過度，呈現出由淺到深嘅顏色變化。由青出藍再出紫青而勝於藍……呢啲就真真正正嘅染藍嘞。
睇到呢度，终於感受到「青出於藍」嘅句中意境係幾咁有詩意。青同藍嘅互通又互借，盡顯古人文采，名謂蓼藍嘅綠葉植物提取出嚟叫靛青嘅染料，可以將布織染成比蓼藍綠葉的青綠更青更藍更深嘅顏色。咁就係勝於藍嘅妙筆所在。呢啲係咪就係「你所懂的？」