男學生著校裙被訓導狂鬧，過萬網民插學校性別歧視

昨日於「名校Secret」這個page出現一篇極係轟動的文章，由屯門某間學校的學生匿名寫的。內容大約是講述近日學校舉行便服日，於是有幾名來自四年級的男學生借了女同學的校裙回校，誰知訓導主任強行把這班男學生拉入男廁，迫他們換回普通便服。但當男學生多番問及訓導主任：「點解唔可以著裙？校規冇寫。」訓導主任不懂如何回答仍然強迫他們脫下校裙。最後情況愈來愈嚴重，學校決定要處分這班男學生，但問題是.....校規沒有寫明，為何男生穿裙子就是錯呢？


文章一上載便引起網上熱話，一晚內已經累積超過2000多個分享，1萬3個讚好，很多人都指責學校沒有權利控制學生穿裙還是褲子，是次舉動明顯是性別歧視。有同學指出學校原有校規已經奇怪，包括不准女學生戴黑Bra、眼鏡除了黑色外一律禁止、不可帶鏡子上學等等，每當問及學校此等校規背後意義時，都只有一個答案：「影響校風。」那究竟眼鏡如果影響校風呢？我們便不得而知了。


不過都有一些學生是持反對意見的，他們指校服有相關的規定，一套制度除了表示穿著者的身份，還是代表學校的，所以學校有權控制學生如何穿著校服。

你們覺得呢？學校有性別歧視嗎？

原文：

引用[GUEST] 我係一個黎自屯門既學生。
今日係我地學校既便服日，有一班form4男仔借女仔啲校裙黎著，早會過後就換曬校裙，成堆人尖叫、歡呼、跑黎跑去，震撼全校。
原本其他老師都唔想理，因為校規同埋便服日規矩無寫唔可以著，點知遇到個新黎既煩膠老師報串，搞到成個教員室都知，佢地上完小息後個堂就比埋伏係課室門口的訓導主任（其實權力已經大過校長）捉左，一個一個咁拉入男廁除曬裙換返便服，而班男仔問點解唔著得個陣，個訓導唔知點答，就威脅佢地如果唔換就落訓導室用其他方法處理，即是記缺點，佢地堅持要求訓導解釋，但最終不敵訓導主任的無理取鬧。
故事仲未完，等到lunch放飯，個班男仔見到訓導走左，就攞其他校裙黎著，衝出校園，以示不滿。無奈食完飯返去學校，前後校門口已經有兩大將軍（訓導）駐守，即使我地呢d係學校既線人點樣幫手都無補於事，訓導甚至唔比人出去，驚係拎衫比佢地換。最終，訓導勝利，死傷慘重。

但係訓導老師盤問期間，無任何罪名可以告入佢地，佢地不斷掙扎，訓導不斷搵錯處告佢地，但係班男仔不斷搵校規漏洞，啲訓導甚至謊報校規，話校規有規定男仔唔應該著女仔校裙，但其實手冊入面無任何條例係唔比男仔著校裙。
班男仔話佢地一早睇左校規，個老師原形畢露講左句：「你地睇左早講吖嘛」最後，班男仔係訓導室出面等，而全部訓導老師黎曬開會。訓導見佢地不斷堅持，最尾放棄話下個禮拜開行政會議，即是七大部主任投票決定究竟應該點懲罰。
事情就係咁，但係究竟點解佢地要接受懲罰？究竟老師無列明清楚規則，校規無講明唔比著，便服日前宣布亦無示意同學唔可以著異性校服，點解佢地要受罰，點解佢地要被冠上莫須有罪名，如果無寫都唔比做，全部都由訓導話事，咁點解要有校規？唔通呢到係極權主義社會，訓導成日抱怨話同學唔體諒佢地，但其實如果互相讓步，件事都唔會咁尷尬，班男仔出街一齊食飯，就要比人捉。唉。
大家又覺得點？