馮盈盈爆係雞係公廁論被圍插，麥明詩發文對抗舊派港姐

大家都知馮盈盈一向有嗰句講嗰句，不甘喺娛樂圈做個偽人，所以比人冠以「粗口港姐」、「mk港姐」之名，讚佢相比起其他藝人貼地冇距離感。呢排喺《#後生仔傾下偈》馮盈盈再次爆出驚人言論，初初眾人討論緊做女仔既好處，例如嫁有錢人會比人話做少奶奶，但男仔就會比人笑入贅、食軟飯，點知佢突然講左句：「如果我地嫁有錢人，就比人話『睇死佢啦！想吊金龜啦！係雞係公廁！』」。唔知係咪想效法今屆落選佳麗工藤佑采黑面，比師姐黃心穎彈出黎公開指罵件事，想再次睇下真性情同有原則之爭，記者今次都特登搵左幾個港姐師姐訪問。當中2010年季軍莊思明直接訓斥馮盈盈好cheap、搏上位，有損港姐身份；連1989年亞軍朱潔儀都話佢用字好肉酸。


件事引黎年輕網民好大回響，批評嗰兩位師姐戴住光環企道德高地話人，留言指佢地虛偽、扮上等人、對號入座等等，仲建議咁保守封建不如入返古墓咁話。有人重提前cookies成員傅穎講粗口會打冷震舊事，笑佢做藝人仲扮天真；又提出大美人李嘉欣都曾經向劉鑾雄爆曬粗，證明佢地對人不對事。

相反一班上左年紀既網民唔撐馮盈盈，仲鬧佢口沒遮攔。其實鬧馮盈盈既人應該冇睇返個節目，搞錯左兩樣野：第一，有啲人曲解佢意思，佢係想講如果嫁俾有錢人會比人話係雞係公廁，唔係佢自己認為做港姐就一定代表公廁。第二，佢只係引述部份網民對港姐嫁有錢人既睇法，唔代表佢自己係咁覺得。以前大家成日話袁詠儀當年講野唔莊重、英文差、態度寸寸貢，依家一樣大紅大紫。所以反映做港姐又好、做藝人又好有人中意就得，既然冇講錯野得罪人，根本唔需要步步為營，唔需要飾演每個人心目中嗰個完美既自己。


不過件事未完結，莊思明冇啦啦喺instagram動態隔空繼續話支持馮盈盈既人：「不要再用不負責任的言論去攻擊人，每個人都有自由去表達自己的感受，沒有人是對或錯！你們不容許別人有其他想法，你們會想盡辦法用最毒的字眼去傷害那個不認同你的人！這種思維很恐怖，但我不會畏懼！我做人從來都係對事不對人，但好明顯有人係對人不對事，不想再講因為無道理可言。」，佢男朋友楊明都有幫口。



麥明詩身為馮盈盈老友好夠義氣忍唔住喺instagram隔空鬧返啲舊派港姐：「何謂cheap也？見風使舵、見利忘義、損人利己、坐享其成。只憑言辭一兩句而妄下斷言，未免略為片面。#後生仔傾下偈有一集講cheap精」，引黎大批網民讚好。講真今時今日再唔係要求女人三從四德，做應聲蟲既時代，如果因為講真話怕人公審，要時刻審言慎行會好辛苦，即使做到或會淪落到近日熱播《延禧政略》富察皇后既下場。