馮盈盈最怕得罪網民，爆有公司女藝人「被」拍謎片

最新第183集講「最不可得罪的人」，一開始個個都話侍應、工人、化妝師、家姐，怕佢地會做陰濕野報復自己。不過其中一位大學生Danny心水清話係網民，因為對於藝人黎講佢地係衣食父母，所以唔可以得罪，馮盈盈非常認同。佢提出左幾點：首先佢地好執著，講錯一句就大鑊；之後又有大量時間花喺網絡世界上面，藝人只可以用有限時間同佢地戰鬥係冇可能贏。總之得罪佢地，佢地有呢個執念就會日日夜夜瘋狂起底，起唔到底就瘋狂造遙、抺黑，將假野講到似層層咁。造遙之後得字都唔夠，仲要整圖、改圖、惡搞片，key樣上去色情片上面！


馮盈盈話依家啲人如果想追星或者報復好簡單，用人工智能程式最新科技，就可以將女星或者明星大量唔同角度既相合成落色情片女星頭上面。出黎效果好逼真，成條片即刻變左嗰個女明星個樣，但個身體係人地。合成咩片可以自己揀，唔止得A、B、C、D套餐比人配搭，中意咩情節、款式、明星都可以。

麥明詩唔識死，話想整比自己試下如果拍色情片既話好唔好睇。馮盈盈就爆原來公司有女藝人已經咁樣比人整，不過就唔係自己......小編記得有條色情片的確比網民瘋傳過，嗰個就係依家已經係索爆人妻既陳自瑤......唔知大家諗起邊個受害者？曾經試過合成其他人既Danny繼續講落去，話原來過程好簡單，只係幾張相就得。陸浩明好驚訝，如果咁樣冇得解釋都幾慘，對於玉女既話直頭係無妄之災；麥明詩反指就算解釋左都冇用，姐係一百個人睇過可能只有二十個人唔信，加上睇過既人心裡面有影響，不自覺有印象、記住左。


馮盈盈繼續分析點解網民最唔可以得罪，當藝人比人講閒話，件事唔係真都好，一句「好人好姐點會比人講閒話」、「空穴來風，未必無因」或者「咁多個點解要傳佢呢？一定係佢本身黑人憎」就好似合理左成件事，博取大家盲目認同，增強可信性，搞到藝人們好慘。