李龍基代未婚妻王青霞向傳媒道歉：佢係細路女嚟㗎

藝人李龍基的37歲未婚妻王青霞（Chris）目前被控逾期居留、作出虛假陳述、使用虛假文書等6罪，須還押候訊。二人原定於去年年尾拉埋天窗，有傳李龍基已把7個物業全歸Chris名下，但Chris自稱家中突然遇白事，導致婚事緊急煞停。有人懷疑Chris騙財悔婚，她於是高調向某家傳媒闢謠，自稱家底優厚並透過優才計畫來港，曬出多份證書作證，卻被發現文件錯漏百出，遭質疑造假。她隨後反口指責傳媒沒有得到她的同意就刊登證書，又稱國務院「國家科技進步獎」的證書其實是朋友的P圖惡作劇，企圖推卸責任。

李龍基今早（23日）探望完Chris後受訪，並代替Chris鄭重向相關傳媒道歉：「唉，呢啲唔可以怪責任何人，若然自己真係做咗，就要承擔。我相信呢次教訓都好大㗎喇，希望佢重新做人，唔好再犯以前嘅嘢。我代表佢向該傳媒講聲對唔住，對唔住。因為佢係細路女嚟㗎啫，真係好細路女，有時佢嘅諗法唔係同我一致，所以好多嘢佢冇同我講，咁變咗我都唔知。我喺度再一次代表Chris，代表埋我，向該傳媒講聲對唔住。」
被問到未婚妻被還押會否感到寂寞，李龍基哽咽起來：「係.. ...有時... ...係！因為平時兩個人有傾有講，同埋屋企好多嘢都係佢Set Up晒，返去見到洗衫、掛衫全部嘢都冇人理，得我一個人喺屋企... ...不過唔緊要啦，我相信捱過呢段時間，就會好好㗎喇。」他再次強調，事件結束後一定會遵守承諾娶Chris為妻，他們很大機會會到國內辦手續，希望Chris未來乖乖地做自己老婆，甚麼都不用擔心。

資料&圖片來源：綜合媒體報導、TVB 娛樂新聞台、網絡圖片