【為咗做機師你可以去到幾盡？】踏上民航機師之路！

顯示分享連結
今時今日想做機師﹐自然會有唔少斤兩。十個入行嘅九個學歷、經驗、熱誠樣樣齊﹐就算航空公司收得十個﹐好多時另外四、五十人都夠料﹐佢地可以話只係輸啲天時地利（當然前提係先過英文關）。今次我並唔打算分享一啲面試技巧同心得（因為我唔係考官肚入面條蟲，我亦冇辦法俾到咩意見您），反而係一啲投考機師嘅門路/途徑。

想做飛機師大致上有兩種途徑入行，主要分為：
1. 一步一步循序漸進，由自費、學飛、考牌，然後做Instructor儲Flying Hours，到搵Chartered Flight嘅工最後入Airline 做民航機師。過程大概係四至六年不等。
2. 考入任何航空公司資助或開辦嘅飛行員培訓計劃，通過一年多嘅訓練然後成為民航機師。


想做飛機師喺香港可以叫做一件幸福嘅事，因為三間主要嘅本地註冊航空公司都有開辦「飛行員培訓計劃」，所以大多數土生土長嘅香港飛機師主要都係經上面提及嘅後者入行。

咁投考「飛行員培訓計劃」嘅過程又係點嘅呢？

國泰航空公司飛行員培訓計劃係1988年開始至今已經開班超過100班，培訓出超過500位本地機師。多年來呢個計劃嘅招聘方式同過程一直與時並進，時至今日投考嘅過程大概係半年左右，考生仍然係要過五關斬六將。


首先你要喺網上報名，然後公司會篩選左合適嘅考生邀請佢哋嚟進行考核，考核內容分別有飛行理論問答、心理測試、HR interview、Technical interview、Group Exercises、Flight Planning Exercises 等等。通過晒以上嘅呢一啲考核之後成功過關嘅考生中需要通過香港民航處嘅Class 1 Medical Check同埋ICAO English Test。

當以上嘅所有考核都通過晒之後，航空公司就會正式錄取考生成為飛行員培訓計劃嘅學員，今時今日每一班落去澳洲訓練嘅學員大概由10到14位學員組成，會喺澳洲阿德萊德完成為期大約一年嘅嚴謹訓練。
==================================================

Facebook: Sam哥飛機駕駛艙
Instagram: Samgorflight

如果喜歡我們的文章，請即分享到︰