【力求進步】美斯謙稱自己並不全面　「呢樣嘢我仲需要練習多啲！」

有啲乜嘢好得過完美？就係更完美。現今足壇球皇美斯，世人都認為佢係完美之際，從來都好謙虛嘅佢，都表示自己仲有地方可以進步。近來，美斯接受傳媒專訪，謙稱自己並不全面，有一項技術仲需要練習更多。


美斯「自爆」一個需要進步嘅地方

究竟係咩「技術」，連美斯自己都覺得要再做好啲呢？呢位阿根廷球星就話：「我想做到完美無暇，而我仲有啲地方必須進步，先至能夠達到最高水準。」

記者再追問係邊樣，美斯就答：「邊部分？咪就係12碼囉！我必須練習更多。」


美斯指自己將來不會成為教練

另外，美斯仲講到將來會唔會教波，以及家庭生活等等話題。被問到退役後會唔會以教練為職業，美斯就有啲卻步：「退役之後，我可能唔會做教練喇，不過仲有啲時間諗諗，我仲可以改變主意嘅！」

「喺屋企，我同家人好少講足球架，喺巴塞隆拿或者阿根廷嘅 Family Time，特別食緊 lunch 嗰陣討論足球係一件好奇怪嘅事情！」


美斯談及家庭生活

傾到家庭生活嗰陣，美斯就話：「我有一個超級平常嘅家庭生活。冇錯，有時我希望可以帶我啲屋企人散吓步，而唔會每行一步都有球迷截停我。成為一個家長、一個爸爸嘅感覺好奇妙，呢樣係咁耐以嚟，喺我身上發生過最好嘅事情之一！」
一個咁愛屋企人嘅球星，抵你有咁多 Fans 嘅！美斯，就算你唔練好啲12碼，你都係世界上最好波嘅球星嚟架喇！

來源：Sportsbible