新同事，你唔識用FAX 機可唔可以直接話唔識呢？

話說新同事得罪左阿head，阿head已經好少同佢交流，工作上的事，不是email通知佢，就係透過我哋做中間人。
其實關係去到咁，基本上佢係公司既前途都叫玩完，阿head唔睇好你，唔緊要。起碼唔好無視你，不過好明顯新同事已經「一步到位」，係後者。

咁好啦，佢留低，我哋繼續教佢啦，最重要係多個人，多個幫手，反正公司資源，係咁架啦，袋住先囉。

話說有一次有文件趕住用要第二日開會，於是請新同事幫忙fax資料比另一間公司，簡單講明細節，就叫他儘快處理。

臨走前，由於唔放心，多口問多次。
「你知唔知點fax？」
「知。」

見佢咁講，我就放心張文件交俾佢，然後繼續自己手上的工作。

不過，過左半個鐘都未見新同事番黎，我諗住可能多人排隊啦，又或者佢fax完唔記得話我知，做緊其他野。我不斷同自己做心理輔導，覺得咁簡單既任務，佢應該無問題。
點知一個鐘後，佢依然未回坐位，我開始諗係咪去左偷懶。愈想愈好奇，於是走去fax機看過究竟。

不看還可，原來新同事仲企喺fax機面前，於是我走上前問他。

「fax左未？」
「未。」
「咁你成個鐘做緊咩？」
「等緊張紙消失…」
「什麼?」我以為自己聽錯。
「我按左『fax』掣好耐啦，張紙仲未fax出去……」

細問之下，原來依佢既見解，Fax 文件既程序係等文件完全透過電線分解後，再係人地間公司既Fax機重組……睇得多「數碼暴龍」上腦咩？明明唔識fax 又要扮識，比人發現又口啞啞……做咩姐？！一張紙「被消失」係一部Fax機面前，究竟係咩邏輯？最可怕係佢竟然可以答得咁理所當然。

我無言了。

不怕神一樣的對手，只怕豬一樣的隊友，我之後仲可以點對佢委以重任? 看來人多好辦事不是一定的，有些時候都要靠自己。