黑仔「阿強」射波記

打工仔偶然想調整下心態或者行個方便，可能都會試過「射個三分波」（請病假），無可厚非。
不過有時唔係唔俾你射，不過射得黎要留意細節，如果唔係分分鐘害左成team人，淪為豬一樣的隊友。

話說阿強請左年假，喺假期最後嗰日即興請多日病假過珠海玩，但好衰唔衰佢女朋友upload左張相，仲喺facebook tag左佢，寫住「BB請病假同我去珠海玩，今晚要好好報答佢XD」。

睇到D咁誘人嘅caption，同team同事個個流露羨慕嘅目光，大嘆「這些機會不是屬於我的」。而當我哋欣慰阿強終於做返個「成功人士」之際，好景不常，原來有一個向來同阿強有牙齒印嘅同事識得佢女朋友，如此天賜良機可以置阿強於死地，又點會唔咬住佢呢？

只見嗰個同事留言問阿強「點解你扮病唔返工？」咁都算啦，最慘係佢跟手tag埋department head落張相度，令上司睇到阿強張相，完成埋借刀殺人嘅最後一步。
前一秒Teammate仲羨慕緊，下一秒個個變做隔岸觀火嘅花生友。

斷正後，阿強返到公司即時被department head「照肺」，好彩及時「補鑊」，除左出示醫生紙，仲解釋張相是舊相，只係「遲左上載」，而caption話請病假只係「純屬講笑」。

唔知係阿強「企硬」定命硬，上司接受左佢嘅解畫無再追究，但因為同team人疑似「知情不報」，要跟多個project做「懲罰」，不過阿強都學精左，即時張嗰個同事剔除在fb朋友之列，算係止蝕。

請假請到俾人找到罪證，仲要害到同team人一齊受罰，睇黎阿強仲係阿強，呢個名同「黑仔」依然係分唔開。