阿強追女記

話說老友阿強最近用上「洪荒之力」，終於約到女神出街，佢同我哋講嗰一刻感覺就好似贏左全世界咁，仲話「上帝叫我得到女神」，非常誇張。
但原來越級挑戰未必就代表成功同幸福。

點解咁講？

因為呢個女神實在太有錢，有錢到一個點係對身邊兵仔或者現實社會完全唔理解（或者根本唔需要去理解）。因為平時比人嬌縱慣，落去唔同地區出巡對佢黎講係陌生得黎危險但又帶吸引嘅挑戰，但佢想比兵仔感受到追求女神的曙光，唯有硬住頭皮咁去。

而咁岩港鐵開左條新南港島綫，阿強就諗不如去海洋公園玩返日，等女神有個美好回憶啦。據阿強嘅口供，佢當日除左大熱天時喺門口苦等1個鐘兼買定入場劵之外，全程好似周倉幫關羽提大刀咁左手用手機瘋狂幫女神影相，右手幫佢拎手袋，不過佢覺得嗰日既氣氛都算幾好。

正當阿強以為今次有分加可以升做上士之際，不幸嘅事情就發生喇！
正當佢哋想話喺海洋公園站搭港鐵離開嘅時候，女神竟然喺閘機位置拍完八達通之後，望住閘機顯示綠色前進箭嘴但呆企無動作，阿強見佢無反應，就喺佢身邊細細聲提示「得喇，行得喇」，女神先推閘入去。落到月台之後，佢又指住牆上寫左「黃竹坑站」的廣告，同阿強講「原來海洋公園喺黃竹坑站架！」，阿強唔識指鹿為馬，即刻糾正「唔係啊，係海洋公園站！」。女神聽完之後，覺得兵仔咁樣數落自己令自己好無面，塊面紅完再黑，結果阿強做嘅事就比呢10分鐘澈底KO。

我哋聽完個故事都安慰阿強，話追唔到未必係壞事。個女仔咁嬌生慣養又離地，做到你女朋友都一樣有煩惱。分分鐘到時無廁紙用又唔識買，要你成日搭的士拎比佢就麻煩！說到底，愛情講求關係對等，唔係就咁單純搵一個人陪自己咁簡單，如果對方一直擺姿態又當你無到，即使做到伴侶都未必舒服，倒不如搵個相處舒服又適合自己嘅。