卡卡踢中超！傳即將與貴州簽約一年，同「法叔」做隊友！

你冇睇錯，真係傳緊卡卡去踢中超啊！據意大利報章《羅馬體育報》嘅消息，巴西中場卡卡嘅下一站唔係返去聖保羅，亦唔係退役，路過米蘭，探完呢間曾經係佢最風光之時嘅球會後，有傳之後將會加盟中超球會貴州恆豐智誠！


離開奧蘭多城之後，卡卡一直未有決定佢職業生涯嘅尾站係喺邊度，而近來嘅報導就指佢好有機會踢中超，內容直指同貴州恆豐智誠即將完成簽約一年。如果係真嘅話，都好上去一轉貴州睇卡卡現場踢一次波，始終機會唔多喇！

貴州恆豐智誠喺今年中超位處中游，以12勝6和12負得42分嘅戰績，取得第八名完成今季聯賽。隊中除咗有隊長兼香港隊後防主力法圖斯之外，亦都有啱啱喺香港開餐廳嘅「歐沖」歐陽耀沖，不過「歐沖」嘅上陣機會就寥寥無幾，要比啲心機喇！

來源：GOAL.COM、羅馬體育報