【舊事重提】前利物浦CEO：巴塞因為蘇亞雷斯咬人，想壓我地價！

日前，前利物浦CEO伊恩艾爾喺進行演講個陣，提到紅軍當年賣走蘇亞雷斯既決定。伊恩艾爾表示，呢位烏拉圭國腳被賣既其中一個原因，係因為佢喺世界盃入面咬傷意大利後衛基亞連尼。

伊恩艾爾咁講：「首先，我想講利物浦係唔想賣走蘇亞雷斯，係一啲都唔想，但係我地無得揀，因為佢喺世界盃進行期間又咬傷人。」

「我仲好記得，喺蘇亞雷斯咬傷基亞連尼之後，巴塞隆拿既體育總監即刻打俾我，話呢位烏拉圭前鋒再一次犯上一啲漠視紀律既錯誤，所以要壓我地價。不過，我好肯定咁拒絕咗對方既壓價，因為喺巴塞隆拿提出報價之前，蘇亞雷斯已經咬過人，所以一個崩都冇得減。」

照伊恩艾爾咁講，即係喺世界盃開始之前，巴塞隆拿已經報價求購蘇亞雷斯，而紀律性麻麻既「咬咬」，似乎都為利物浦帶黎唔少既壓力，所以紅軍最終都係選擇忍痛放人。