【第四簽】拜仁慕尼黑成功以3700萬歐元簽入法國新星！

喺成功簽入魯迪、蘇利同埋格拿比之後，德甲巨人拜仁慕尼黑日前再完成一宗重要的收購！獲得拜仁賞識的球員係里昂中場托利素（Corentin Tolisso），佢將以3700萬歐元的轉會費登陸安聯球場。

擁有法國 + 多哥護照的托利素，喺2007年加入咗里昂的青訓系統，隨後喺2014年夏天，被提拔上一隊。司職中場的托利素，技術特點相當全面，唔單止擁有出色的攔截質素，得分能力仲好高添！

統計指出，喺16-17年球季入面，托利素一共代表里昂出戰47次，期間交出14個入球同埋7次助攻，顯示呢位法國中場擁有相當高強的得分效率。除咗中場角色之外，現年22歲的托利素仲可以勝任右閘或者右翼衛的角色，喺沙比阿朗素同埋拿姆先後掛靴的情況下，呢位法國小將絕對係加盟得相當合時！