陳偉豪落選港隊，是因為政治原因！？

(編按：港隊教練金判坤主動解釋大豪落選原因)
香港隊隊長陳偉豪，意外落選東亞盃外圍賽的大軍名單。陳偉豪昨日透過社交網站Facebook留言，暗示自己落選是別有內情。

司職中堅的陳偉豪，表示自己堅持當足球員、為港隊比賽，全因為是他的堅持和因為他是一個香港人。他暗示自己不是狀態不佳而落選今次名單。陳偉豪在留言說：：「如果因為狀態唔好而唔入選，我會欣然接受，但如果係因為某種原因的話，恕我不能接受！」

傳聞他落選有兩個原因：一是他所屬的球會南華不願放人，二是陳偉豪曾多次參與佔領活動。在雨傘運動發生後，陳偉豪多次聲稱練習後路過佔領區而休息，因此令不少球迷猜測陳的落選是因為政治原因。

陳偉豪在文中亦透露，香港足球一直得不到政府資助，全靠有心人士才撐起香港足球。
陳偉豪Facebook留言：

引用今日諗返起我第一次代表港隊出外比賽嘅時候，係去星加坡踢”獅城盃“，當時只得十五歲，對讀緊書嘅我黎講，可以有機會著上港隊波衫比賽，真係感到非常之光榮！

踢左代表隊十幾年，經歷過好多大型嘅賽事，帶俾我好多難忘嘅回憶，最重要令我體會到喺香港做足球員一D都唔容易！

政府有幾支持香港足球……大家心照，代表隊只係靠一D有心人出錢去撐住，所以港隊球員嘅待遇十幾年都冇改善過，係事實！
有時如果你唔小心踢國際賽受左傷，返球會踢唔到或者表現唔好的話，又俾球會「炸型」，咁其實又好正常啫，球會出糧俾我架嗎！
出去參加大型運動會，其他項目運動員知我地冇成績，知我地出局要早走，你估佢地用咩眼光睇我地？？咪就係冇眼睇囉，望都費事望你呀！
睇到呢度你可能會有一個問題……「踢代表隊咁乜乜乜咁你又踢咁耐？」，其實好簡單，原因只得一個，因為我係香港人，香港人唔踢香港隊，唔通搵晒外援國援踢呀？？所以唔使再問我幾時或者會唔會考慮退出港隊，不論我係甚麼年紀，只要港隊教練覺得我仲有能力幫到佢的話，我係一定會答應！

我做足球員其實都係打工仔一個，我可以選擇每日準時練波等出糧，但足球對我黎講，唔係我嘅職業，而係我嘅事業，我嘅事業就應該由我自己話事，冇人可以幫我做決定，如果因為狀態唔好而唔入選， 我會欣然接受，但如果係因為某種原因的話， 恕我不能接受！

(資料來源：陳偉豪@Facebook)

請支持此Facebook專頁：https://www.facebook.com/worldsportfever