【考古】當年今日朗拿甸奴零助跑「扭屁股」射球，3人縫中收死施治！

攞過兩屆世界足球先生嘅細哨朗拿甸奴，當年嘅「快樂足球」圈粉無數，筆者也是其中一個小球迷。呢位「球場魔術師」除咗招牌笑容之外，佢嘅風格最吸引人之處係仔永遠估唔到佢下一步會做咩動作，就好似2005年嘅今日，歐聯16強，巴塞隆拿對車路士嘅賽事，呢下零助跑「扭屁股」射球：


連傳奇球證哥連拿都話呢球係佢球證生涯見過最靚嘅入球：「最令我印象深刻嘅係朗拿甸奴喺史丹福橋嘅入球，當時佢喺禁區線上，扭動兩下屁股後篤射，個波直飛死角。由於太突然，大家都感到驚訝。」

不過呢球雖然係世紀金球，但都幫唔到巴塞扭轉敗局。當年巴塞首回合主場以2-1險勝車仔，返到車仔主場，籃軍一開始就主攻，更一口氣連入三球，雖然朗拿甸奴梅開二度回敬，但泰利下半場嘅頭鎚為車仔奠定勝局，巴塞最後以4-5出局。