細哨神技再現！賓施馬背脊控波擺脫2名守衛再射入

「細哨」朗拿甸奴擁有各式各樣的奇技，其中一招令人嘖嘖稱奇嘅就係佢用背脊都可以控波，甚至可以精準傳個波俾隊友。


細哨退役之後，筆者一度以為有生之年都難以見到有其他球員可以用呢招用得咁靚，就好似大哨嘅插花已幾乎絕跡球場一樣，但估唔到，今日俾我喺皇馬前鋒賓施馬身上見到，佢仲用呢招入咗球靚波！

當時阿拉巴中場長傳，精準傳到賓施馬頭上，可惜佢喺對方兩名球員看防下，好難用正常轉身控球，於是佢竟然情急智生，用背脊控咗個波落嚟，而且落點非常靚，剛好佢可以就住右腳狂抽，最後個波省到對方後衛隻腳入網。

官方精華：https://www.youtube.com/watch?v=X_as6XtYSVo（由1:13開始）