【西班牙盃】卻奧斯隔3個波位「氣功攔截」對手慘食牌！

西班牙盃16強，皇家馬德里要戰至加時憑伊斯高同夏薩特入球，先反勝艾爾切2：1驚險晉級。呢場波夏薩特終於打破8個幾月嘅入球荒，不過今場主角除咗佢，仲有卻奧斯，後者雖然無入波，但就因為一幕離奇攔截慘食一張黃牌。

當時係比賽嘅78分鐘，皇馬係進攻方，不過可惜皇馬嘅攻勢未到對方已被艾爾切嘅前鋒堤迪莫蘭迪偷波，後者偷波後想用「施丹轉身」轉身過關，可惜失去平衡倒地，而當時卻奧斯就喺佢身邊「行」過。

無錯，係「行」過，但當莫蘭迪倒地後，球證就吹雞，仲表示卻奧斯犯規，卻奧斯大惑不解，上前理論，點知跟住仲食埋牌！睇返慢鏡，卻奧斯隻腳當時同莫蘭迪相距至少有三個波位，除非卻奧斯識得少林派嘅「氣功攔截」，否則根本無可能整跌對手。可惜由球證證角度睇過去，兩人身體有重疊，可能因為咁而影響咗球證當時嘅判斷。