寶刀何止未老！37歲泰亞高施華狂奔大半場護空門　哈索賓基：仲勁過雲迪克！

泰亞高施華，巴西後防嘅定海神針，亦可以話係前世界第一中堅，儘管已年屆37歲，但對比賽嘅影響力依然係世界級。昨日英格蘭聯賽盃決賽，雖然泰亞高施華効力嘅車路士飲恨，但呢位老將嘅表現話俾世仲知，佢寶刀未老之餘，但好鋒利！

下半場有一球，車路士門將伊度亞文迪草率嘅傳送，將個波餵咗俾對手費賓奴，後者迅速傳個波俾前場嘅文尼發動快攻，其後文尼看準機會再傳俾沙拿，形成一個絕妙嘅單刀機會。雖然呢個波看似會斜出，但由利物浦後場狂奔咗大半場，返到自己後場嘅泰亞高施華非常小心，唔俾對方任何機會，將個波大腳解圍！



除咗呢球，泰亞高施華全場比賽都表現出色，無論係防守，抑或由後場發動進攻，佢都表現出一個世界級中堅嘅水平。


賽後，天空體育嘅三位評論員都對呢位巴西中堅有高度嘅評價，前利物浦中加歷查話：「佢真係令人覺得難以置信！咁嘅年紀仲可以做到呢啲，佢同雲迪克都係世界級。」
不過前車路士前鋒哈索賓基就有少少唔同意，因為佢認為佢比雲迪克仲勁少少：「泰亞高施華，一流。雲迪克，都係一流。不過施華球技更好一啲。」