另類VAR？塞爾維亞球證靠球迷手機推翻越位判決

自從VAR被引用到足球場後，球迷都以為可以減少無謂嘅爭議，注意力可以重新返返到球賽本身，可惜VAR帶來嘅相關問題不比無VAR嘅年代少，相信有睇開波嘅球迷就知筆者講咩。

不過經VAR判決已經成為足球賽事主流，就好似塞爾維亞一個低組別聯賽，雖然無VAR「協助」球證，但最近就有由球迷用手機自製嘅VAR，幫助球證判決。

話說當時球證判咗一個罰球入波無效，原因係有球員越位，然而喺球隊同球迷抱怨之後，球證跑到一個球迷身邊，因為呢位球迷用手機紀錄咗成個入波過程。球證睇完呢個另類VAR之後，決定推翻之前嘅越位判決，重新判定入球有效！
不過呢個做法顯然值得商榷，因為當地聯賽並無相關規例，容許球證可以借用賽會以外嘅第三方器材協助判決。