【冷知識】開季已鎖定亞軍！世界上最小型的足球聯賽，一季對賽18次

英國錫利群島足球聯賽日前開踢，呢個聯賽係世界上最小型嘅足球聯賽，只有兩支球隊，Garisson Gunners 以及 Woolpack Wanderers。

錫利群島位於英國西南部，人口3000人唔到，大多數居住喺聖瑪麗斯島。錫利群島係歐洲旅游聖地，擁有豐厚嘅文化遺存。


作為英國嘅一部分，錫利群島居民對足球嘅熱愛未因外在條件而減少，即使只有兩支球隊，佢哋都會隆重其事。

錫利群島足球聯賽時長四至五個月，兩隊互相踢18次，場場都係打吡戰，最後定出冠軍。賽季開始前，球員們會喺當地一間酒吧碰頭，然後兩隊隊長就會挑選各自成員組隊。

一樣嘅場地，一樣嘅更衣室，一樣嘅隊友，甚至一樣嘅對手。

無主客場、無升降制、無長途跋涉。

每季差唔到二十次咁嘅交手，唔知係咩感覺呢？

雖然外人睇起嚟有啲枯燥，但當地人卻樂在其中。2016年，錫利群島聯賽作為世界上最小型嘅足球聯賽被載入健力士世界紀錄。


不過就算係世界上最小型嘅聯賽，錫利群島亦要面對來自社會層面嘅影響。一般嚟講，16至25歲嘅球員係兩支球隊嘅核心。但由於事業同生活嘅選擇，好多處於呢個年齡嘅年輕人都選擇離開錫利群島，去英國其他大城市發展。
然而，錫利群島足球聯賽仍吸引不少英國人眼光，十二年前，adidas 就曾經組織專業團隊，為神秘嘅錫利群島足球拍攝咗一部時長約4分鐘嘅紀錄片，球星包括碧咸、謝拉特同和韋拉都有參與。


雖然受到唔同方面嘅限制，但錫利群島嘅足球依然故我。可能大家會問：咁「無聊」嘅足球聯賽會唔會令人厭倦？但對當地居民嚟講，無波踢無波睇嘅日子，先會令人厭倦。