有洋蔥！基亞利殊「毛毛蟲」慶祝動作源於一個承諾

英格蘭昨日世界盃首戰輕鬆以６：２大勝伊朗，當中效力曼城嘅基亞利殊（Jack Grealish）射入個人生涯世界盃嘅第一球，而佢嘅慶祝動作非常特別，就係擺動雙臂，好似「毛毛蟲」扭來扭去。原來呢個慶祝動作背後有段故，而且非常感人。

不到一個月前，11歲患有腦麻嘅球迷芬利（Finlay）寫信俾基亞利殊，後者親自回信，並邀請芬利到曼城參觀。喺交流中，基亞利殊邀請芬利俾佢設計一個入球後嘅慶祝動作，並承諾佢會喺下一個入球獻俾芬利。



基亞利殊喺賽後就話：「佢同我妹妹一樣患有腦麻，而我同佢相處得好愉快。佢希望我能為佢做慶祝動作，而好好彩，呢次（入球）發生喺世界盃期間。」

事實上，基亞利殊加盟曼城後入球感覺麻麻，而之前佢嘅國家隊生涯一共亦只係入咗一球。然而，基亞利殊喺世界盃首戰就取得入球，並上演咗溫馨嘅呢一幕，或者呢個就係上天嘅安排。