背傷未醫好 夢想已遠去？

現年二十四歲嘅文家永曾經遠赴西班牙到西乙B聯賽落班，兩年前就回流港超，先效力港會一年，再轉會到上季效力嘅理文。
佢本身就打開防守中場，但係效力港會嘅後期教練就因為佢速度快而要求佢改打翼鋒。由於佢本身係比較防守型嘅球員，加上港會係魚腩份子，打翼佢都較為保守，收得比較深。不過將佢改造成為翼鋒之後，佢都對住富力入過一球窩利抽射，令人印象深刻。

去到理文之後季初都有唔少上陣機會，位置通常係右翼。但係佢似乎都未太慣打翼，打翼嘅時候表現都比較遜色。反而由於本身打開防中，作客富力一役放佢喺攻中喺禁區頂做致命傳送同遠射就效果仲好，個場有球禁區頂抽射仲差啲入波添，可惜中楣彈出。好景不常之後佢已經因為深受到背傷影響，再冇乜出場時間。

近日各隊球隊公佈名單都無文家永呢個名，經過同佢本人聯絡之後，得知佢原來仲受著背傷困擾，會好快進行手術繼續治理傷勢，新球季內亦都好難復出。佢之前接受傳媒訪問話夢想係代表香港隊上陣，似乎呢個夢呢刻對佢黎講有啲遠……