盧卡古打正前係曼聯破密集最大障礙

曼聯上季最終四大皆空，英超大幅度落後俾死敵兼冠軍曼城，而歐聯方面更係俾實力相當一般嘅西維爾喺十六強淘汰出局。領隊摩連奴上任以黎仍然係無攞過咩重要錦標，黎到第三季必然壓力巨大。摩連奴唔知係咪壓力大得濟，近排喺記者會都怨婦上身，怨呢樣怨個樣。
不過曼聯強強對決主守再防反就無乜問題，相反要主攻會死守嘅弱旅就經常性出現問題。歸根究底就係正前鋒盧卡古未夠班擔正任曼聯嘅單箭頭。盧卡古無疑擁有強勁嘅體格、高爆炸力、速度快兼有身高優勢，但係佢做支點能力惡劣，幾時出黎現位組織攻勢、First touch同走位都非常有問題，令到前場組織經常一到盧卡古就斷哂，進攻節奏受損。咁點解盧卡古對弱旅又入到波？因為盧卡古不斷破壞曼聯攻勢，曼聯其他球員就會見組織極都入唔到對方危險地帶就自然得閒吊下高波入禁區博亂，而盧卡古就有時可以憑身高優勢壓住對方守衛入波。其實防反時需要組織嘅次數亦較少，盧卡古亦可以憑速度為對方帶黎少許威脅，後場大腳轟上黎亦可以經常頭槌二傳俾到隊友，所以強強對決盧卡古都仲有少許作用。


曼聯成績要再進一步，前鋒一定唔可以再用盧卡古。因為只要對手有少少針對性佈處就已經可以凍結到盧卡古，佢就已經好難成日屈高屈速，亦會暴露first touch唔掂嘅問題。事實上季前友誼賽無咗盧卡古，曼聯進攻已經順咗好多。以馬斯亞或者山齊士擔任正箭頭，佢哋都聰明過盧卡古好多，知幾時現吓位、點樣俾其他球員後上插入、俾波尺寸力度亦洽當，令曼聯進攻更流暢。咁用左其他人打正前，盧卡古係咪無用處？當然唔係，曼聯一路都無好嘅進攻右路球員，盧卡古有速度、爆發力、唔死扭、傳中波ok又係左腳可以方便內切入，代表比利時對巴西嘅世界盃八強打呢個位就表現一流，已經代表盧卡古適合打右翼多過正前。我建議曼聯用山齊士擔任正前鋒、盧卡古打右路進攻球員，咁一黎山齊士打正前跑動少咗就可以減慢回塘速度，盧卡古遠離中路令攻勢暢順，馬斯亞同華舒褔就因為左路無左山齊士而更多上陣機會有助成長，根本對曼聯百利而無一害！