球迷不滿堅升溫！大埔進攻套路出問題？

和富大埔啱啱喺港超聯俾冠忠南區絕殺，唔少大埔球迷都直接話係教練李志堅調動出問題先搞到隊波輸波，亦有唔少球迷認為出輔鋒盧高令到球隊進攻方面節奏減慢，老鼠拉龜！一時之間，大埔球迷唔滿意教練李志堅表現嘅意見，終於喺社交網站爆哂出黎！
事實上今季大埔大肆擴軍，球隊實力增加咗唔少，球迷對球隊嘅要求提高唔少亦係正常不過。先被夢想FC逼和，再接連僅負傑志、南區，三場不勝嘅走勢係差咁啲㗎喇。不過今日就先講下俾球迷不斷鬧嘅盧高先喇。

盧高係一個技術型，又扭得、遠射了得、護球能力唔錯、停到波既進攻球員，但係同時又過份個人主義嘅球員，好多時攞到波都過份上腳！由以上見得，最好就放佢喺4231嘅十號位，有兩隻快翼幫手拉邊，而佢負責禁區頂停波再派牌嘅工作。

今季大埔主要打433同352嘅陣式。大埔打433嘅時候放佢打邊路，但係佢本身鐘意上腳，又成日想內切入自己射咗佢，導致好多時候個波喺佢度失控球權，進攻就會成日喺佢度斷哂。而打352嘅時候，佢同伊高沙托尼都太鐘意番後拎波踢，導致兩個人成日同時番咗後，前面就無支點做第一點，呢個同之前上季迪亞高、伊高沙托尼同場時候嘅問題一樣。
大埔其實有力加大個進攻火力，就係打4231。長期打4231搵好似鄭子森、李嘉耀呢類球員長期拉邊，再由盧高做主角長期企喺十號位，兼由伊高沙托尼或者哈利長期留喺前面停波，咁前場進攻火力就更加立體，有威力得多。如果要堅持352，亦要分工清晰，唔好長期兩個都番後拎波。

大埔今季好多唔同種類嘅球員，可以配合出唔同嘅陣式，希望堅sir李志堅可以好好利用陣中嘅球員，為大埔爭取佳績喇！