贏波背後隱患多 A米球迷咪咁開心

AC米蘭啱啱周中2:1憑隊長羅馬洛尼入波絕殺擊敗熱拿亞，豪取兩連勝重返前四行列。只係呢場勝仗毫無說服力，贏波過程更係醜陋到不得了。
教練加度素今場竟然排出3412陣式，每個位置嘅人選仲要係極度奇怪。中堅起用洛迪古斯、羅馬洛尼同梅沙斯奧打;翼衛就用蘇素、拿沙特擔任，之後中場中就有巴卡約高、基斯爾，加埋打攻中嘅查漢洛古組成。前鋒線就希古恩伙拍年輕射手攻堅。呢個陣根本攻又唔係，守又唔係咁。

*今場司職後防線左中堅嘅洛迪古斯本身係出擊型左閘，今場轉打中堅明顯完全唔適應。今場司職中堅嘅佢竟然都成日照殺上前場助攻，導致佢本身嘅防守位置有空位俾人打反擊。AC米蘭被追成平手一球，正正就係俾人打穿條左路。

*用蘇素打右翼衛亦係失敗之作。話就話打哂成條右面，但係佢唔回防之餘又成日入咗中間，令到右路根本直情無人幫手進攻拉邊。

*出咗雙箭頭，以為直接玩高空轟炸喇？但係無正式嘅速度球員長期前面拉邊，又出習慣地面進攻嘅禁區頂停波能手查漢洛古喺禁區頂，導致成日同前鋒走位重疊，進攻大塞車，形成老鼠拉龜嘅情況
AC米蘭之所以入到第一球，完全係靠蘇素個人能力入嘅，同戰術近乎完全無關係。至於奠勝球，就係隊長羅馬洛尼把握臨尾對方門將犯錯笠入，都係同進攻戰術套路無乜關係。今場AC米蘭可以贏到真係好有運氣，但係唔係場場可以咁好彩㗎嘛。今季AC米蘭對住弱隊成日都打得好辛苦，教練加度素真係唔可以成日臨住靠運就得，要諗諗計，幫球隊建立一個對弱隊可以撕破密集嘅進攻套路！