台北睇波一日遊記

《台北睇波一日遊》
睇完第一場北韓對蒙古，老實講冇乜感覺，或者係事不關己喇。不過港隊球員最尾個場對蒙古都要小心啲，蒙古都幾茅下，搶唔到你個波就下下踢腳。

咁尾場呢，香港2:1搞掂中華台北呢場，就睇完個刻會覺得絕殺好爽好興奮，但係對過程就有啲失望喇。今日港隊進攻板斧真係冇乜，一直就直接放長傳、斬中……只不過前場又冇人停到波落黎，等到個波直接入到禁區，前線啲球員又次次遲一拍先到，一係炒哂飛機。進攻球員有機會憑個人能力整到啲半單刀機會，又偏偏搞唔掂。成場波就斬、放長傳，完全無乜陣地戰，節奏又慢，講真真係幾悶下。

好彩嘅係下半場中段一次傳中，麥基終於頂咗個波入網，幫香港隊先領先一球。領先咗一球之後，其實好多機會可以拉開比數，但係又浪費哂啲機會。後防臨尾仲要唔集中俾人入番球，如果唔係後備入替嘅鐘偉強神來之筆入球遠射，香港隊大概可以已經宣佈出線唔到東亞盃。
今場好多人話曾錦濤唔掂，其實佢今日有幾下好靚嘅攔截，又喺適當時候插上去助攻，真心唔算太差。反而中堅羅素同法圖斯就好多甩漏，交失波幾次、又交埋啲高章波，對住對手啲速度型球員往往都顯得好吃力吓。

今場贏中華台北完全無乜說服力，不過希望香港隊之後可以打好啲喇。大家完場都嗌「贏北韓」，不過呢個環保口號嗌咗咁多年，都未試過真係贏到……唔會寄望可以贏到北韓，但求香港球員盡力可以打一場好波！