【預告】傑志 vs 佳聯元朗：元朗夠唔夠薑對攻？

本來呢個禮拜係國際賽期，香港本土比賽會暫停，讓路俾港隊進行比賽。奈何港隊主教練位置仍然未能夠確認新人選，本來安排好嘅友賽亦只好取消。多咗一個檔期出黎，亦都令到傑志對佳聯元朗呢場港超聯比賽可以提前上演。
相對上傑志對呢場比賽一定比較重視，爭梗聯賽冠軍嘅對傑志場場都非常關鍵，一定都會當係決賽咁踢;元朗方面護級方面已經再無壓力可言，戰意成疑。加上外援基斯、杜馬思、慕沙、王睿四位外援分別都因為停賽同需要出戰國際賽，而未能夠上陣，主教練郭嘉諾亦未能親自領軍。大家一般都認為佳聯元朗一定輸梗，仲要係傑志大炒格，我就認為佳聯元朗係有力至少逼和傑志。關鍵就在於，佢哋夠唔夠薑同傑志鬥攻。

由於今場佳聯元朗嘅杜馬思同王睿都唔能夠出場，元朗後防就算仲有法比奧都好，至少都一定要用至少一個嚴啟華、黎格爾呢啲無論經驗同能力都比較差少少嘅年輕後防球員。傑志亦一定知道元朗後防唔穩，好大機會擺大個頭強攻佳聯元朗。係後防唔穩陣情況下，咁如果佳聯元朗決定採取穩守反擊，進行穩守嘅時候，對面猜唔到入禁區，破唔到密集，好大機會瘋狂放高波俾對面嘅坦克車盧卡斯，甚至出埋泰迪打442，不斷俾人轟高波，嚴啟華、黎格爾身材比較削，係咁同盧卡斯埋身鬥法，好易頂唔順，俾對面成功撞散條後防，然後一散咗就肯定大敗一場。
所以佳聯元朗今場要拎到分千祈唔好穩守，要加大壓迫強度、加快比賽節奏，同對方鬥攻！由於羅梓駿、鄭展龍、陳晉一都要打U22，所以今場傑志註定無年青球員，活力會差咁啲。如果元朗瘋狂壓迫，將比賽節奏推高，唔俾傑志慢慢猜，傑志反而有機變成頂唔順嘅一方！如果元朗真係進取哥不斷迫、打快攻，傑志充滿老將後防有機會出洋相，所以我建議元朗可以試吓出4312，中場可以試下出郭子階、基爾頓、陳曉峰充滿活力嘅三個中場進行壓迫，前線再配輔鋒嘅陳廣豪，前面再加卡立同卓耀國，相信球隊嘅速率會幾快下，可以試圖用速度衝擊到傑志中後場。

季前就好多人睇死佳聯元朗，認為佢哋今年只係一支魚腩，結果佢哋今年一次又一次令人跌爛眼鏡。今場波大家又再一次睇死佳聯元朗，話唔定佢哋又可以再一次令人跌爛眼鏡！