外地看球記

中華台北 vs 所羅門 賽後有感

尋日第一次現場睇國際賽，世界排名124嘅中華台北主場迎戰世界排名142嘅所羅門群島。睇一場係完全唔關香港隊事，係感覺梗係有啲怪。我淨係知道兩國嘅邦關係有啲機會短期內有改變，足球方面真係乜都唔知咁濟。睇住面前兩隊唔太熟悉嘅球隊，或者可以話根本無乜留意過嘅球隊，當然亦係有啲怪。不過可能旁人眼中，喺足球沙漠台灣睇波，根本係痴線中嘅痴線。由於我對兩隊波真係唔多熟悉，我就住今日見到嘅大概講下。
教練摩西帶領嘅所羅門群島感覺上球員嘅身體質素、個人能力同速度都唔錯，由其係喺斐濟聯賽落班嘅9號仔B Totori，幾次過人、扭波都有板有眼。喺組織攻勢方面佢哋係有待改善，佢哋控球在腳、慢慢猜波嘅時候成日都可以兜口兜臉交失，好似無乜默契咁，咁搞法對強少少嘅球隊，應該唔多掂。當中華台北長期全軍壓上，所羅門群島截到嗰波之後嘅快速反擊，真係好有威脅，好幾次都令到中華台北後防風聲鶴淚，最後亦係靠一個反擊攻勢博到十二碼射入致勝球。

今場係中華台北新教練Louis Lancaster嘅主場地標戰，不過今場佢哋表現或多或少有啲令人失望。今場中華台北其實成場波控制住比賽節奏，不過制造到威脅嘅攻門實在唔多。今場可以見到中華台北不斷向前面邊線放長傳，不過邊線球員朱恩樂、Will Dokin身體素質唔夠對手強，好多時邊線球員都唔夠對手黎，根本爆唔贏人。
去到下半場教練見勢色唔對，似乎叫球員直接斬俾正前鋒李茂，交俾佢用個人能力突破。情況的確有所改善，李茂幾次都成功爆贏對手後防球員，有次甚至扭過埋對方龍門，可惜佢係一隻大哂鬼，幾次大chance都要嘔番出黎。喺教練換走李茂之後，球隊又重新向邊線長傳，試圖落低傳中，只係成功次數少之有少。其實教練見到場上斬高波唔得，係咪可以因應情況，改變一下策略，用多啲地波呢？長遠而言，教練Louis Lancaster亦一定要諗諗長傳急攻係咪中華台北嘅長遠踢法？球員身體質素唔強，長傳準繩度又唔高，放到去前面又未必夠對手湧。既然擁有嘅中場控球能力唔差，朱恩樂、Will Dokin 又有一定技術，倒不如試吓放棄不斷打邊路嘅想法，試吓玩集中中路嘅地面組織，話唔定會有意外驚喜。另外今場後防王睿表現有啲失望，甩咗幾球波，又幾次俾人輕易扭過。至於龍門潘文傑繼對北韓有精彩表現之後，今日亦都再次有精彩嘅演出，有幾次神救。要不是潘文傑，中華台北隊隨時輸多兩三球。
今場波以中立球迷角度黎講，都算刺激同精彩嘅，可以睇住兩面球員輪流出錯……不過認真講，綜觀成場波，有咁多進攻機會都把握唔到，後防又成嗰日派膠，中華台北隊今場輸波，只能講三隻字：「怪自己」。