基奧：引入第七外援係一錯再錯

【港足話題】基奧：增加第七外援名額 會係一錯再錯
日前香港隊喺U23亞錦賽外圍賽輸俾北韓，亦都繼而出局，無緣奧運。近年經常入選香港隊成人代表隊嘅入籍前鋒球員基奧就認為香港隊斷層太大，所以出現呢一個情況。

啱啱回流加盟港超中游球隊嘅基奧認為足總要為呢一個情況負上責任。「現時香港隊出現呢一個情況，係因為足總無乜遠見。我哋香港成人隊可以輕鬆贏蒙古，又可以和到北韓，喺東亞盃外圍賽出到線……但係今次隊U23呢？對蒙古都咁難贏到……對北韓就完全無得打，你就可以見到個分別有幾大，係出現一個斷層。點解？咪因為成年隊同港超太多入籍球員，年輕球員無辦法上到位。有好多入籍球員拎到護照已經3字頭，好少可以踢到一段長時間，只可以幫到香港隊踢三年，但係足總就照徵佢哋入去，根本無做過長遠規劃，香港足球又點可以進步呢？」

佢亦提到香港足總近日提出增加一個中澳台名額係一錯再錯。「加多一個外援名額可能可以提升到少少聯賽水平，不過就扼殺埋年輕球員嘅機會。久而久之年輕球員出場更加少，代表隊就更難吸納年輕球員。年輕球員無國際賽經驗，就更加難成長，斷層更加大！如果遲啲啲入籍球員少咗，咁香港隊水平就可能會大幅下降！」
基奧提議要解決呢個問題，可以參照其他亞洲聯賽。「其他亞洲聯賽近年為咗青訓可以做好啲，推出咗唔同措施，佢哋而家代表隊水平都急速提升！我認為可以引入場上可以出五外援，但係同時就必須出番兩個U23球員嘅制度，咁可以引誘球會出多啲年輕球員，年輕球員亦可以從中得益。」

大家又同唔同意港足U23同港足一隊水平差好遠？又點睇第七個外援名額呢？大家留言討論下！

_____________________________________________________
Follow 守拙 :

Facebook page : https://www.facebook.com/staystupidhk/
Instagram. : https://www.instagram.com/staystupidhk/
Fanpiece 專欄 : https://www.fanpiece.com/profile/u263539.html