和富大埔亞協主場4:2擊敗航源 表現卻稱得上災難級

今季和富大埔可以話係威係勢，港超聯暫時排喺榜首，亞協分組賽第一場亦成功4:2輕取傑志。黎到第二場亞協分組賽，再次以4:2擊敗對手。不過今次對手係全組最弱嘅台灣球隊航源，比賽過程嘅演出係可以稱得上災難級。

由於航源球員平均技術比較差，所以佢哋進攻上採取策略係放長傳去前面俾外籍球員湧。防守上亦一定比較差，無死守能力，所以同時將防線壓得比較前，加強中前場壓迫，將比賽節奏加快，試圖可以亂棍打死大笨象。
大埔面對一支實力比較差又有以上咁嘅取態嘅球隊，竟然間同對手一齊癲，又係不斷放長傳、換邊……咁嘅打法導致場波攻守轉換節奏勁快，同時令對方有更多機會進攻，放大失波機會，可以話係極為不智！大埔球員實力同質素高過對面一大截，洗乜同人硬碰硬呢？其實可以將後防縮番後少少，拎到波唔洗咁心急放長傳，可以慢慢猜、慢慢組織。對面玩到咁高位壓迫，慢慢猜，就自然會多空位出到黎。利用空位去製造機會，點到比起硬碰硬容易啦！

另外大埔球員心態亦明顯唔及對手，部份後防球員明顯有輕敵嘅心態，心態上出現問題。第二球失波正正係後防球員冇緊貼對方嘅進攻球員，艾華度比賽中亦出現唔少走甩人嘅情況。辛祖亦係表現得非常懶散，走動亦比賽少。就算伊高沙托尼入咗兩球都好，點解十二碼入俾人撲走之後，係即刻抱頭，而唔係追上去試圖補中呢？結果龍門咪輕鬆拎番個波！迫一迫，至少令佢驚一驚都好。

雖然大埔亞協兩連勝值得高興，但係過程就真係難以令人滿意。要知道，要喺分組賽晉級，有可能係要計得失球。今場主埸對全組最弱對手，拎得兩球當然係唔合格。不過之後最大考驗係對黎自北韓嘅425，希望大埔可以再取勝仗啦！