麥柏倫點兵戰世盃外 入選球員合乎情理|港足話題|守拙

仲記唔記得上次世界盃外圍賽，香港隊兩次勇和中國隊？仲記唔記得上次世界盃外圍賽，落後卡塔爾三球之下，香港隊都無放棄，臨尾連入兩球拉近比數？呢啲畫面大家都應該仲歷歷在目！世界盃外圍賽話咁快就番黎啦！香港隊9月5會先作客柬埔寨，之後喺9 月10就會番主場迎戰伊朗。香港隊主教練麥柏倫就已經公佈咗呢兩場波嘅23人大名單，我個人覺得今次入選球員都幾合情合理！

名單如下：

守門員：葉鴻輝 (東方龍獅)、王振鵬 (傑志)、袁皓俊 (理文)
後衛： 翟廷峯、馮慶燁 (東方龍獅)、法圖斯 (貴州恆豐)、羅 素 (河北華夏幸福)、丹 尼、艾里奧、唐建文 (傑志)、徐宏傑 (梅州客家)、梁諾恆 (富力 R&F)

中場： 李嘉耀、徐德帥 (東方龍獅)、陳俊樂 (廣州富力)、黃 洋、鞠盈智 (傑志)、陳肇鈞 (冠忠南區)、黃 威

前鋒： 艾力士 (大連一方)、辛 祖、孫銘謙 (和富大埔)、夏志明 (冠忠南區)



第一場比賽作客實力柬埔寨，預期港隊係需要比較進取。柬埔寨實力比較差，香港隊對佢哋嚟講已經係算最易打嗰隊。今次第一場比賽就主場打香港隊，一定會希望以拎到分數為目標，預期佢哋會先隱守，再搵機會博亂爭取入波。上場麥柏倫地標戰面對中華台北就係面對對手穩守，港隊無乜心機慢慢組織，淨係不斷過急放長傳俾前場，結果前場經常接應唔到，或者接應到都唔夠人幫拖……製造唔到有效攻勢之餘，仲要輸兩球反擊輸咗場波！今場波香港隊一定要有耐性慢慢組織，而大名單裡面鞠盈智、黃威呢兩名組織力比較強嘅中場，相信對組織攻勢會有所幫助，適宜呢場波用上佢哋擔任正選，前鋒亦有適宜用番上次落選，適合主攻嘅機會主義者辛祖，前場火力就會有保證。相信香港隊只要有耐性慢慢組織、大部份時間拎住控球權，唔亂咁放長傳，香港隊第一場比賽要全取3分，係冇乜困難嘅！

vs柬埔寨本人心水正選陣容(433)

葉鴻輝
徐宏傑 法圖斯 羅素 丹尼
黃威 黃洋 鞠盈智
徐德帥 辛祖 艾力士

第二場比賽主場面對勁旅伊朗，香港隊真係凶多吉少。伊朗隊波機動性強，隊波運轉速度極快，球員實力亦高港隊幾班。香港隊要制衡伊朗，首先要縮後防線，唔好暴露空位俾人入，中場要有活力去進行壓迫，前場就需要速度型前鋒反擊。咁樣適合第一場上陣，可以幫助組織嘅鞠盈智、黃威同比較叻把握入球機會嘅辛袓喺第二場比賽要打防反嘅時候，就唔適合登場，反而換上活力十足、走動範圍大嘅陳肇鈞、陳俊樂就比較適合，前鋒亦要換上比較適合反擊嘅夏志明，咁速率先唔會輸伊朗太多，先有贏波嘅一線生機！另外，希望大家九月十都可以入場撐港隊，一齊大嗌"We are Hong Kong " "，令開波嗰陣香港隊有個主埸氣勢！
Vs伊朗本人心水陣容(442)


葉鴻輝
徐宏傑 艾里奧 羅素 丹尼
陳俊樂 黃洋 法圖斯
陳肇鈞
夏志明 艾力士


香港隊明顯9月5面對柬埔寨同9月10面對伊朗嘅取態、踢法都需要有啲唔同，而23人大名單有哂適合兩種唔同取態嘅球員，希望主帥麥柏倫會用得其所，幫香港隊爭取到好成績！香港加油！