【港超周日回顧】流浪紅牌無天理 理文屢錯失良機

話說今日罕有地同一比賽日嘅香港本土比賽都有東網直播，終於可以俾身處馬德里嘅版主，喺星期日凍冰冰接近零度嘅朝頭早，八點晨早起身觀賞哂同一比賽日兩場賽事。呢種違久嘅滿足，只有身處港外嘅本地波擁躉先會明。
頭場有今季攻力十足嘅流浪主場深水埗迎戰衛冕冠軍傑志，戲碼吸引力十足，現場有成過千球迷入場。雖然傑志趁球迷未坐定，就已經憑杜馬思喺角球機會，成功擺脫盯佢嘅巴辛而先入一球，開賽分靚鐘已經先拔頭籌。至不過咁，上半場比賽形勢並唔算係一面倒，尤其傑志星級射手丹恩奴域傷出之後。或者流浪認為對手無咗把握力超然嘅星級射手，自己後防壓力比較細，所以開始壓上啲，都做到一啲攻勢。不過形勢較為均都無乜用，因為佢哋後防未有吸取教訓，杜馬思三十分鐘又一次憑角球用差唔多招數去擴大比數，流浪教練團真係要諗諗計點樣改善死球防守。

雪上加霜嘅係流浪日籍外援中堅林遼太完半場前一次同對手鋒將艾力士嘅碰撞，球證意外地出示第二面黄牌俾林遼太，令呢位日籍外援要提早番入更衣室沖涼。我個人覺得呢張牌實在太harsh，甚至連犯規都未必係。林遼太同艾力士都係全心去波，根本並無明顯犯規動作。可能係事後艾力士瞓喺地打幾個轉，艾力士嘅演技太厲害，成功呃到球證。林遼太被逐之後，比賽節奏仍然偏快，起初並唔感覺到流浪打少個，下半場初段仲要憑近期著哂火嘅巴辛追番球。只係打少個始終係打少個，傑志下半場中段注入新血陳肇鈞之後，流浪終於頂唔住，兵敗如山倒，後防尤其金旻奎同劉學銘唔知做乜完全亂哂龍，完場一刻失到足足成六球咁多。如果我係流浪教練，我會即刻叫李輝立雞是但一個中後場外援。還掂咁多個中後場外援都守成咁，倒不如放棄一個，將啲錢去簽多個中前場外援，比教練團去有機會輪換下巴辛同袓連奴。
流浪尚且有得同傑志攻下，但香港U23作客到理文嘅將軍澳就無咁好彩。即使理文正選陣容有一定輪換，香港U23全場都係落於下風，一面倒捱打，鏡頭多次捕捉到香港U23龐焯熙沮喪嘅面孔。不過要沮喪嘅，可能係理文主教練陳曉明，事關今日理文把握力實在太離譜。係，無錯。我知道杜查祖理亞梅開二度，而最後理文亦入咗四球，但係其實基華尼頓一個人都錯失左五、六個埋門機會。就算係司職後防嘅余煒廉，都有至少三次入球機會。如果今場把握好啲，理文隨時可以入夠十球，甚至唔止。理文大體上現位、走位同進攻套路都無乜問題，係差在點樣可以更有效地個波入網。

今季睇咗咁多場，暫時睇唔到邊隊有冠軍相住，但係幾肯定香港U23同港會呢兩隊肯定會包攬尾兩位，呢兩隊嘢根本完全無能力同其他球隊一戰。至於下場直播，根據現時足總官網，要等到月尾足總盃四強先再有，嗚嗚。