傑志再勝泰國球隊 亞冠首仗成功打響頭炮 向出線淘汰賽目標前進

-
今季香港本地聯賽前排因為防疫措施再度收緊而腰斬，但係無阻各支港超球隊代表香港參加亞洲賽。傑志尋日就先喺亞冠分組賽迎戰泰國上季足總盃冠軍清萊聯。傑志賽前三個月無正式比賽下，唔少球迷甚至港台評述都擔心傑志比賽狀態係咪足夠應付亞冠盃。結果傑志以表現回應，一比零擊退強敵清萊聯，取得隊史亞冠第五場勝仗，同上年一樣首輪就成功打響頭炮。


傑志今次係連續第二年參加亞冠盃分組賽，有咗上年同埋二零一八年嘅經驗，主教練朱志光排兵佈陣以及場上球員嘅臨場發揮都明顯比上兩屆成熟。主教練朱志光今次就排出一個類似4141嘅陣式。龍門有保羅，後防有羅拔圖同陳晉一擔任兩閘，中堅有艾里奥同謝家強；中場方面有巴爾拿出任單防中，前少少就有基爾頓同明加索夫，左右兩翼就有安永佳同羅梓駿支援星級前鋒丹恩奴域。今次呢個陣同上年打亞冠勝利十一人相比，球員流動性係更多。上年用黃洋、巴爾拿同基爾頓嘅中場係主守為主，冇乜換位，最多就係基爾頓推進去前場策動吓攻勢咁。

今年有咗謝家強喺中堅位，可以釋放多個亞援放喺中場，令成件事唔同哂。今場波用巴爾拿、基爾頓同明加索夫呢三個中場，令傑志變化多咗。防守嘅時候仍然維持4141左右嘅陣式，但係當傑志控球在腳嗰陣，巴爾拿不時會回後到中堅組織，基爾頓同明加索夫覆蓋範圍就極大，隨咗會協助組織同推進之外，仲會去到禁區頂走位入楔，而由於左閘陳晉一都鐘意出擊，令到傑志有攻勢嗰陣，對手心臟地帶往往有五六個傑志球員，有好次都產生都一定威脅，十七分鐘嗰次就更加產生入球添，由新援明加索夫地標戰射入處子球。


傑志今場防守方面出色到令人只可以有讚無彈，進攻失控球之後回防速度極高，每次人哋控球都好快會有人拍到，好少有走甩人，令清萊聯前場球員甚少可以發揮以致無計可施、長期老鼠拉龜。如果傑志下場中後場可以維持到呢個表現同水準，零封狀態奇差嘅神户並非不可能嘅任務。至於如果想贏埋嘅話，前場進攻就要再處理好啲，今場去到三閘線啲決定都好一般，例如有球羅梓駿明明已經對嗰龍門，偏偏佢決定要回番後。下場想贏波，呢啲細節位一定要做好啲。雖然人哋狀態差啫，不過始終都係日職隊，無咁易會俾你攻得入。最後都係嗰句，每當香港球隊面對外隊，請大家槍口一致對外，撐自己人！希望傑志可以達成佢地出線淘汰賽嘅目標！