豬肉佬都可以上位 香港球圈中人一樣有潛力
今時今日喺香港，一個大叔喺街市斬斬下豬都可以無厘頭做到網紅，仲要抵死到有商場大排筵席幫佢開生日會，咁我就覺得香港本地足壇人才輩出，唔少球圈人士都多才多藝之餘，亦樣靚身材正，例如安永佳同黃威最近都俾有廣告拍，我相信要捧一個球壇中人成為網絡紅人，絕對唔會難過捧個豬肉佬，只需要有合適宣傳策略、營運方針同埋長遠發展計劃，社交媒體粉絲人數破萬容乜易。如果要我喺本地足壇任揀其中一位人兄黎捧，我唔會揀咩靚仔球員，反而覺得標準流浪總監「立立」李輝立先生先會係最理想人選。
-
1.優點：字字珠機
-
立立多年黎向傳媒申訴球證或者足總不是，都豪不留情，兼且留低唔少金句，最經典莫過於「請埋呢啲垃圾球證」，讓球迷津津樂道。假如李輝立開設網絡節目，相信一定會喺節目中爆出唔少金句，吸引網民食花生。
-
優點：不忌諱、敢言
-
立立多年黎都豪不忌諱，想講就講，呢種風格肯定會吸引唔少觀眾，畢竟其他足球評論都相對收斂。加上佢喺球會管理層，唔會好似球員咁怕爆料影響前途，要就住就住。立立已經一把年紀，加上佢球壇地位，絕對可以盡訴心中情。事實上近兩季佢喺流浪社交媒體上載解釋某些特定議題嘅影片，都獲得唔錯嘅反應，有做網紅潛質。
-
優勢：多年在球壇、了解球圈運作
-
立立最大優勢就係佢已經屹立球圈多年，了解
整個球圈嘅文化同問題，相比其他現存香港足球評論嘅局外人，會更加能夠直接指出問題所在。佢嘅人脈亦一定夠多，要拍片講時下熱門話題，隨時打幾個電話已經可以搞清來龍去脈，可以向觀眾透露內幕消息或者秘聞。
-
優勢：地位比其他存在競爭者高
-
李輝立如果加入網絡戰場，其中一個極大優勢就係佢嘅地位。現時以討論足球為主嘅幾大頻道，都唔係球圈中人，甚至完全無入過香港足球圈。立立唔係好似某人咁係個失敗導演，亦唔係閒時先接觸足球，反而管理足球係日常事務，而且屹立球壇多年，所以佢提出嘅論點會比大部人更有說服力。佢亦唔似何振廷咁係球員，唔可以亂講廿四，佢係球隊總監，佢可以拍攝嘅題材可以更廣，唔只係比賽前後嘅vlog。
-
缺點：年紀偏大
-
立立最大缺點就係年紀偏大，唔係後生仔女，唔可以賣弄顏值吸引流量。
＿＿＿＿＿＿＿＿＿＿＿＿＿＿＿＿＿＿＿＿＿
營運定位與題材
-
李輝立如果要打入網絡市場，成為足球界網上紅人嘅話，內容最緊要多元化，要拍多啲類型cover哂老中幼，另外亦唔可以只係focus本地波球迷，而係要全港足球迷！以下係我初步諗到立立如果要搞YouTube Channel 可以拍影片嘅idea。
-
1.與退休球證討論環球爭議判決
目標觀眾：所有球迷
-
立立經常對球證有所不滿，而全世界唔同聯賽周不時都會有唔少爭議判決。如果立立整一個節目向全世界球證定期發表「意見」，再請黎相熟退休球證詳細分析判決，節目會有一定可觀性。
-
2.邀請球壇元老分享往事
目標觀眾：老一輩球迷、對港足史有興趣人士
-
屹立球壇多年，立立人脈肯定足夠應付一個港足史節目。如果立立整個訪談節目，主要回顧以往香港足球，相信大把嘉賓會接受邀請，老一輩球迷亦會收睇節目懷念過去，對港足歷史有興趣嘅後生仔亦會被吸引。
-
3.球隊日常營運
目標觀眾：年輕球迷
-
近年唔少網上串流平台為外國球隊或者球製作紀錄片，除咗普巴嗰條之外，多數出黎嘅效果都尚算正面。如果李輝立同流浪好似啲紀錄片咁，喺社交平台出多啲介紹behind the scenes 片，例如日常操練情況、半場教練講話，甚至係球隊點樣搵外援，相信可以吸引到八卦嘅年輕網民。
-
4.與各球迷對話
-
唔同球迷有唔同諗法好正常，而香港現時充斥住唔少大大小小球迷組織或者經營足球內容嘅自媒體。如果阿立立可以續一邀請佢地訪談了解球迷想法，會係一個唔錯嘅交流。
-
當然，以李輝立性格，真係會走去做KOL可能性不大，我只係提出要捧球圈中人出位可能比想像中容易。只要肯嘗試，香港足球一定唔會死。如果俾你揀，你又會想捧邊位球圈中人呢？