香港友賽緬甸:賽前場內外焦點

經過三年疫情折騰之後，香港隊今晚終於再次有球迷之下主場open door出擊再鬥緬甸，係近幾個月以黎第三次友賽緬甸，開放俾球迷入場同提供直播則係第一次。如果唔係安達臣同對手教練老友鬼鬼，喺咁嘅防疫政策之下，真係唔知港隊幾時先可以重返主場出戰。

今場場外場內都有唔少嘢值得關注㗎，咁先講場外，今場係國安法同國歌法立法之後，香港隊首次喺主場作戰；以往港隊比賽賽前奏國歌環節多次有大量球迷噓國歌，或者甚至自發演唱《願榮光歸香港》，惹嚟大量本地媒體關注，以至令到香港足總吞罰款，今場比賽賽前又會點呢？球迷會違法示威，定湊國家時守法肅立，又抑或作消極抗爭，等湊完國歌先入場呢？大家放長雙眼睇睇。


另一樣野值得關注係入場人數，足總CEO譚生希望入場人數破萬，而安達臣就獅子開大口，豪言想要兩萬人入場，見唔少媒體都有網民留言嘲諷。但係聽聞預售門票已經賣咗超過三千張，加上之前重開嘅港超聯都好多場入場人數預超預期，似乎球迷好多都真係餓波餓得好犀利，所以友誼賽戲碼唔強而破萬嘅奇特現象隨時出現。最後賽前足總安排咗新歌發佈環節同埋特別儀式慶祝港隊助教安尼頓退休，諗住入場嘅球迷記得留意啦。

好啦講完場外，係時候留意吓場內啦。一如大家所料，中國球隊並無放人，安永佳、菇子楠、陳俊樂同梁諾恆若干人等一律無緣今次友賽決選名單，而佢哋基本上都會係黎梗2023亞洲盃鐵膽，所以呢啲友賽係俾邊緣球員爭取機會。不過上場閉門友賽正選陣容貌似已經係最強陣容咁濟，可能已經練咗安達臣想要嘅嘢。我大膽估計佢今場會派費蘭度、余在言呢啲球迷係港隊少見嘅球員上場，俾新鮮感球迷之餘，等亞洲盃其他對手摸唔清港隊底牌，繼續安達臣上任以黎嘅友賽神秘感，甚或有利港隊備戰亞洲盃。


至於出場名單，相信球迷最關注嘅焦點會落喺無安永佳出戰情況下，主教練安達臣會點樣填補中鋒位嘅空缺呢？儘管睇下安達臣會繼續用孫銘謙掛帥，定係會嘗試用更多其他球員，例如艾力士、簡嘉亨呢類去串演，研究吓plan c,d,e呢？另一個值得關注嘅係謝家強同陳肇鈞，兩人新球季仲未揾到新東家，佢哋嘅比賽狀態又點呢？


最後，無論你入唔入到都好，希望大家一陣香港時間八點，大大力支持香港隊主場贏波！Come on Hong Kong !!!