大埔大勝吐烏氣 保連奴成為最大武器

今季港超兩支不勝之師深水埗同大埔今日終於喺菁英盃碰頭，本來大家或者會以為兩隊會係差唔多水平，兩隊會有一番龍爭虎鬥，點知原來深水埗同大埔比，都係未夠班……竟然可以再次被屠殺，雖然無對住傑志咁輸夠雙位數，但對住聯賽其中一支下游球隊大埔可以失到五球，問題都真係幾大吓...賽後主帥潘文迪更加宣布離開球隊。

之前有睇大埔嘅直播比賽，都可以見到佢哋會係主守為主，今場面對較弱嘅深水埗，終於見到佢哋有積極嘅取態，防線都壓得比較上，最搶眼莫過於左閘翁煦濤，佢多次可以上前助攻，甚至有時走到前場右路幫手，由此可以見到大埔有幾咁進取。另外今場大埔利馬喺前鋒王力威身後活動，呢個佈置成功令大埔前場組織能力強咗唔少，不過入球把握力喺前鋒保連奴入替之前強差人意，頭兩個入球都係有啲幸運成份。保連奴入替之後立竿見影，前場有支點停球，以及有個明確目標，如果之後保連奴長期健康，配合主教練李恆匯嘅合理戰術佈置，喺前場有一定威脅力下，大埔成績有望大幅進步。


至於深水埗，如果唔增兵，今季真係要拎到一分都難。由今場可以見到，深水埗根本完全無法阻止對手進攻，利馬同翁煦濤多次舞龍咁舞，尤其嚴啟華嗰位好似放題咁，如果唔係大埔最後一腳同一傳處理得差，真係随時又輸夠雙位數。假如仲係咁樣踢落去，一直唔增兵，季尾真係隨時輸夠百五球，或者而家潘文迪離開，對雙方黎講都會係好事。